Երաշտի հետևանքով առաջացած ավերիչ անտառային հրդեհներից ամենաշատը տուժել է Իսպանիան։ Եվրոպական միության (ԵՄ) Երկրի դիտարկման «Կոպեռնիկուս» ծրագրի համաձայն՝ երկրին բաժին է ընկել հրդեհներից այրված հողերի գրեթե 40 տոկոսը, հայտնում է 20 minutos թերթը:

Փորձագետների տվյալներով՝ երկրում հրդեհից տուժել է ավելի քան 236,9 հազար հեկտար՝ ԵՄ-ում անտառային հրդեհների ընդհանուր տարածքի 37,7 տոկոսը։ Կլիմայի փոփոխության հետ կապված բնական հրդեհները Իսպանիայում ամռանը ծածկեցին գրեթե բոլոր ինքնավար համայնքները: Ամենամեծ բռնկումները գրանցվել են Գալիսիայում, Կաստիլիայում, Լեոնում, Աստուրիայում, Էստրեմադուրայում, Անդալուսիայում, Կաստիլիա-Լա Մանչայում և Կատալոնիայում:

Իսպանիայի քաղաքացիական պաշտպանության գլխավոր տնօրինության զեկույցի համաձայն՝ 2022 թ․-ի սկզբից մինչև հուլիսի վերջ, երկրում գրանցվել է ավելի քան 6,8 հազար անտառային հրդեհ. դրանք հանգեցրել են 2 մարդու մահվան, առնվազն 58-ը վիրավորվել է, ևս 24 000 մարդ տարհանվել է։

Հրդեհներից տուժած հողերի ծավալով երկրորդ տեղը զբաղեցրել է Ռումինիան (23,9 տոկոս), երրորդը՝ Պորտուգալիան (10 տոկոս), չորրորդը՝ Ֆրանսիան (8 տոկոս)։ Փորձագետները նշել են, որ 2022 թ․-ի առաջին յոթ ամիսներին Եվրոպայում գրանցվել է 2295 հրդեհ։ Այնուամենայնիվ, աղետը չի ազդել Էստոնիայի, Լիտվայի, Լյուքսեմբուրգի և Մալթայի վրա. այնտեղ, ըստ Copernicus-ի, ոչ մի հրդեհ չի գրանցվել:

Ավելի վաղ Եվրահանձնաժողովը Եվրոպայի փրկությունը երաշտից տեսել էր քաղաքային կեղտաջրերի մաքրման կայաններից կեղտաջրերի վերաօգտագործման մեջ: Նման թափոնները առաջարկվում է վերամշակել ջրային տնտեսություններում և օգտագործել գյուղատնտեսական նշանակության հողերի ոռոգման համար: