Շատ վաղ արթնանալը կարող է վնասել առողջությանը։ Զգուշացրել է բրիտանացի բժիշկ Անիտա Ռաջան Metro-ի հետ զրույցում։

Քնի պակասն ու շատ վաղ արթնանալը, ըստ մասնագետի, թուլացնում է իմունային համակարգը, քանի որ քնի ժամանակ արտազատվում են ցիտոկիններ, որոնք վերահսկում են բորբոքումները:

Ռաջայի խոսքով՝ անբավարար քունը վատ է անդրադառնում արտադրողականության ու մոտիվացիայի վրա։ «Մարդկանց 23-ից 45 տոկոսը ամեն տարի կորցնում է մինչև երկու շաբաթ աշխատանք՝ քնի պակասի հետևանքով առաջացած արտադրողականության նվազման պատճառով: Հոգնած ուղեղը նման է հոգնած մկանի, որը պարզապես չի կարող դիմանալ մարաթոնին, քանի դեռ չի հանգստացել»,- բացատրել է նա:

Ռաջան նշել է, որ քնի պակասի դեպքում հիշողությունը թուլանում է, քանի որ ուղեղը չի կարողանում «ձայնագրել» հիշողությունները, և վատանում են տրամադրությունն ու հոգեկան առողջությունը:

Բժիշկը նաև հիշեցրել է ուսումնասիրությունները, որոնք կապում են քնի համակարգված պակասը գիրության, 2-րդ տիպի շաքարախտի և սրտանոթային հիվանդությունների զարգացման հետ:

Քնի պակասն ազդում է գլյուկոզայի նյութափոխանակության վրա, ինչը կարող է հանգեցնել նմանատիպ հետևանքների։