«Դիմադրության» շարժումը նոյեմբերի 5-ին մի քանի շաբաթվա դադարից հետո Ֆրանսիայի հրապարակում դարձյալ հանրահավաք է անցկացնելու: Ասում են՝ լինելու է միասնության հանրահավաք ոչ թե որևէ անձի, կուսակցության շուրջ, այլ՝ Արցախի ինքնիշխանության, Հայաստանի տարածքային ամբողջականության և անվտանգության։
Ամբողջ խնդիրն այն է, որ ընդդիմության օրակարգը, որը բխում է Արցախի ժողովրդի շահերից, աջակցություն չունի աշխարհաքաղաքական որևէ կենտրոնում: Արցախի ու նրա ճակատագրի հանդեպ գրեթե սինխրոն հայտարարություններ ընդունվեցին թե Պրահայում և թե Սոչիում, այլ խոսքով՝ ԼՂ խնդիրը հայտնվել է միջազգային խաղացողների լուսանցքում:
Ու նաև՝ Հայաստանի իշխանության «թեթև ձեռքով»:
Ողբերգությունը թերևս այն է, որ Ստեփանակերտի հոկտեմբերի 30-ի հանրահավաքը լայն արձագանք չգտավ նաև Հայաստանի հասարակության շրջանում ու քիչ հավական է, որ «Դիմադրության» շարժման նոյեմբերի 5-ի հանրահավաքը քանակական կամ որակական առումներով նախորդներից տարբերվելու է:
Գործող իշխանությանն անգամ կենցաղային մակարդակում հաջողվել է մեր հասարակության մի զգալի մասին համոզել, որ Ղարաբաղը «բեռ» է ու, ցավոք, հարթակի ընդդիմությունը քարոզչական հարթակում տանուլ է տվել իշխանությանը, ինչքան էլ վերջինիս փաստարկները մանիպուլյատիվ են:
Էլ չասենք այն մասին, որ ընդդիմությունը հասարակությանը ներկայանում է ինստիտուցիոնալ ու քաղաքական հին մոտեցումներով, որոնց շուրջ անցած երկու տարիներին այդպես էլ հանրային լայն կոնսոլիդացիա չի ձևավորվել:
Այնուամենայնիվ, նոյեմբերի 5-ի հանրահավաքը նոր լուծումներ գտնելու շանս է կամ գոնե՝ դրա փորձ: