Լիզ Թրասին կոչ են անում հրաժարվել Մեծ Բրիտանիայի դեսպանատունը Թել Ավիվից Երուսաղեմ տեղափոխելու «անխոհեմ» գործընթացը, գրում է FT-ն։
Արտաքին քաղաքականության փորձագետները Թրասին կոչ են անում վերանայել բրիտանական դեսպանատան տեղափոխումը Երուսաղեմ, քանի որ մեծանում են մտավախությունները, որ այդ քայլը կարող է վնասել Մեծ Բրիտանիայի հեղինակությանն ու վտանգել տարածաշրջանի անվտանգությունը:
Անցյալ ամիս Նյու Յորքում Իսրայելի վարչապետ Յաիր Լապիդի հետ հանդիպման ժամանակ Թրասը հաստատել էր, որ կվերանայի բրիտանական դեսպանատան գտնվելու վայրը, ինչը կարող է Մեծ Բրիտանիային ստիպել հետեւել ԱՄՆ-ի օրինակին, որը 2018 թվականին՝ Դոնալդ Թրամփի կառավարման ժամանակ իր դեսպանատունը տեղափոխել է Երուսաղեմ:
Բրիտանիայի ներկայիս դիրքորոշումն այն է, որ Երուսաղեմը պետք է լինի Իսրայելի եւ Պաղեստինի ընդհանուր մայրաքաղաքը: Դեսպանատան տեղափոխումը կնշանակի քաղաքը որպես Իսրայելի մայրաքաղաք ճանաչել:
Բացառությամբ ԱՄՆ-ի, Երուսաղեմում դեսպանատներ ունեն միայն Կոսովոն, Հոնդուրասը եւ Գվատեմալան։
Նախկին արտգործնախարար սըր Ալան Դանքանը, ով աշխատել է 2016-ից 2019 թվականներին, նախազգուշացրել է, որ դեսպանատան տեղափոխումը «անխոհեմ եւ անբարեխիղճ» քայլ կլինի՝ հանդիսանալով «հիմնական շարժ Մեծ Բրիտանիայի արտաքին քաղաքականության մեջ»։
«Դեսպանատան տեղափոխումը կկործանի Միացյալ Թագավորությունը՝ որպես միջազգային իրավունքը հարգող երկրի հեղինակությունը եւ կխաթարի մեր դիրքն աշխարհում», - ասել է նա:
Մինչդեռ, նախկին արտգործնախարար եւ նախարարության խորհրդարանական քարտուղարի տեղակալ Ալիստեր Բուրթը պնդում էր, որ դեսպանատան տեղափոխումը հետաձգելը կխախտի Իսրայելի եւ Պաղեստինի վերաբերյալ ՄԱԿ-ի Անվտանգության խորհրդի բանաձեւերը, որոնց Բրիտանիան նախկինում աջակցել է:
«Մենք մյուս պետություններին կոչ ենք անում գործել բազմակողմ եւ հարգել իրենց միջազգային պարտավորությունները, ու չենք ցանկանում նահանջել մեր պարտավորություններից»,- ասել է նա։
Լեյբորիստական կուսակցությունը եւ Լիբերալ-դեմոկրատները դեմ են դեսպանատան տեղափոխմանը: Ուեսթմինսթերի արքեպիսկոպոս կարդինալ Վինսենթ Նիկոլսը եւ Քենթերբերիի արքեպիսկոպոս Ջասթին Ուելբին կոչ են արել կառավարությանը՝ «վերանայել» այդ քայլը:
Անհանգստություն է տիրում նաեւ Պահպանողական կուսակցությունում։ Կուսակցության նախկին առաջնորդ Ուիլյամ Հեյգը նախազգուշացրել է ցանկացած նման քայլի համար՝ պնդելով, որ դա «արտաքին հարաբերությունների դաշտում Բրիտանիային ավելի շատ կմոտեցնի Դոնալդ Թրամփին»:
Նա նշել է, որ պատգամավորները մտահոգված են նրանով, թե ինչպես կընկալվի այդ քայլը մուսուլման ընտրողների կողմից, ինչպես նաեւ բրիտանական արտաքին քաղաքականության շահերի եւ տարածաշրջանում կայունության վրա ավելի լայն ազդեցությամբ: