MediaHub-ին երեկ հայտնի դարձավ, որ նոյեմբերի 5-ի հանրահավաքի օրը իշխանությունները որոշել են ծառատունկ կազմակերպել, պետական համակարգի աշխատողներին «գործուղել» մարզեր՝ այդպես լուծելով գերատեսչությունների աշխատակիցների զբաղվածության հարցը։

«Հայաստան» խմբակցության պատգամավոր Ագնեսա Խամոյանը MediaHub-ի հետ զրույցում ընդգծում է՝ արդեն շատ վաղուց որեւէ մեկին չի զարմացնում իշխանությունների այս վարքագիծը, ցանկացած քայլի կգնան, որպեսզի այդ օրը հանրահավաքը հնարավորիս սակավամարդ լինի։ Պատգամավորի կարծիքով՝ իշխանություններին սկսել է անհանգստացնել նույեմբերի 5-ի հանրահավաքը, հատկապես դրան նախորդած Արցախի հանրահավաքի պատճառով, երբ հազարավոր արցախցիներ դուրս էին եկել «Վերածննդի» հրապարակ իրենց արդար բողոքի ձայնը բարձրացնելու առ աշխարհ, առ Հայաստանի իշխանություններ։

«Այս իրավիճակում ցանկացած ապօրինի գործողության իշխանությունը կգնա, որպեսզի նոյեմբերի 5-ի հանրահավաքը սակավամարդ լինի։ Պետք է նրանց հիասթափեցնեմ՝ ես վստահ եմ, որ մեր այն քաղաքացիները, ովքեր այս ընթացքում պայքարել են, մեր կողքին են եղել, նոյեմբերի 5-ին վստահաբար լինելու են Ֆրանսիայի հրապարակում։ Այդ օրվա հանրահավաքը որեւէ կուսակցական մեկի հանրահավաքը չէ, որեւէ քաղաքական ուժի սեփականաշնորհածը չէ, այն քաղաքացիներից յուրաքանչյուրինն է, ով իրեն համարում է Արցախի եւ Հայաստանի տերը, եւ պատրաստ է կանգնել եւ պայքարել»,-ընդգծեց Խամոյանը՝ հավելելով, որ այն ցույց է տալու մեր ազգային արժանապատվության հավաքական կերպարը։

Պատգամավորը շեշտում է՝ այս իշխանությունից սպասել, ակնկալել որեւէ դրական բան, իհարկե, անմեղսունակություն է։

«Վերջապես «ժողովրդավարության բաստիոնից» խոսող եւ Հայաստանի նորագույն պատմության ընթացքում իրենց կազմակերպած իբր ամենալեգիտիմ ընտրությունների մասին աղաղակող ուժը, պարզվում է, անգամ իրենց կուսակցության վարչության ընտրություններն է կեղծում»,-ասաց նա։

Լիա Սարգսյան