Երևան քաղաքի ընդհանուր իրավասության դատարանի Կենտրոն նստավայրում քաղաքաշինության կոմիտեի նախկին ղեկավար Վահագն Վերմիշյանի ինքնազգացողությունը վատացավ, դատական նիստը ընդմիջվեց։

Վերմիշյանի պաշտպան Ալեքսանդր Կոչուբաևը նշեց, որ խնդիրը կապված էր գլխուղեղի արյան շրջնառության հետ:

Նիստի վերսկսելուց հետո Վերմիշյանը կոչ արեց մեկ րոպե լռությամբ հարգել Արմեն Գրիգորյանի հիշատակը, որտեղ օրեր առաջ հասարակական գործիչն իր իսկ դատի ժամանակ մահացավ: 

Նիստը նախագահող դատավոր Մնացական Մարտիրոսյանը չբավարարեց այդ պահանջը, այդ կոչը համարեց անհարգալից վերաբերմունք դատավորի նկատմամբ և Վերմիշյանին 10 ժամով հեռացրեց դատական նիստի դահլիճից:

Ի պատասխան դատավորի՝ Վերմիշյանն ասաց. «Տո քեզ ա պետք հեռացնել, այ Մացո: Մեկի անունը, որ Մացո լինի, ա՛յ անասուն: Նման անասունների պատճառով դարձավ նահատակ: Սրանց պետք է դատել, նաև գլխավոր դատախազին, այդ ամենամեծ ստահակին, որին ամբողջ ազգով կանգնած դավաճան են անվանում»:

Այս ամենից հետո Մնացական Մարտիրոսյանը հեռացավ նիստերի դահլիճից, ինչից հետո ներկաները ոտքի կանգնեցին՝ հարգելու Արմեն Գրիգորյանի հիշատակը։

Երկու տարուց ավելի անազատության մեջ գտնվող Վերմիշյանը մեղադրվում է պաշտոնեական լիազորությունները չարաշահելու, ձեռնարկատիրական գործունեությանն ապօրինի մասնակցելու, առանձնապես խոշոր չափով կաշառք ստանալու և խարդախություն կատարելու մեջ։