Իսպանիայի կառավարությունը ռազմական օգնությամբ, այդ թվում՝ ծանր հրետանու սպառազինության համար զինամթերքով երկու ինքնաթիռ եւ վեց բեռնատար է ուղարկել Ուկրաինա։

«Այսօր առավոտյան (չորեքշաբթի) Ռոտա ռազմածովային բազայից (Անդալուզիայի Կադիս նահանգ) առաջին երկու չվերթները իսպանական զենքերով ուղարկվել են... Նրանք խոշոր տրամաչափի դաշտային հրետանու համար զինամթերք են տեղափոխում Ուկրաինա»,- ասվում է կառավարության հաղորդագրության մեջ։ Ինչպես նշվում է, զենքը տրամադրվում է անհատույց, դրա փոխադրման համար նախատեսվում է հինգ-վեց թռիչք։

Իսպանիայի պաշտպանության նախարարության ղեկավար Մարգարիտա Ռոբլեսի խոսքով՝ այդ մատակարարումների ծավալը կկազմի 75 թռիչք՝ զինամթերքով։

Բացի այդ, Իսպանիայից արդեն դուրս են եկել վեց բեռնատարներ, որոնք պատրաստվել են ի պատասխան «ձմեռային պայմանների համար նյութեր եւ համազգեստ տրամադրելու ուկրաինական իշխանությունների հրատապ խնդրանքի»։ Սպասվում է, որ չորեքշաբթի օրը կմեկնի եւս վեց բեռնատար, առաջիկա մի քանի օրվա ընթացքում դրանց ընդհանուր թիվը կհասնի 25-ի:

Մեկ շաբաթ առաջ Իսպանիայի կառավարությունը հայտնել էր, որ Կիեւի համար պատրաստել է 30 000 դաշտային համազգեստ, 15 600 բաճկոն, 15 000 անջրանցիկ եւ հողմակայուն կոստյումներ եւ մի քանի հազար միավոր տաք հագուստ։