Սոցիալապես ապահով մարդու խաղալը մեզ համար խնդիր չէ։ Այդ մասին այսօր ԱԺ ֆինանսավարկային և բյուջետային հարցերի մշտական հանձնաժողովի նիստում ասաց հանձնաժողովի նախագահ, ՔՊ-ական պատգամավոր Գևորգ Պապոյանը՝ անդրադառնալով «Վիճակախաղերի մասին» օրենքում փոփոխություններ կատարելու մասին օրենքի նախագծին։
Նրա խոսքով՝ եթե սոցիալապես ապահով մարդը կարող է իր ժամանցի համար իր գումարը ծախսել, ապա սոցիալապես անապահով մարդը, կամ մարդը, որ ստանում է նվազագույն աշխատավարձ, նպաստ է ստանում, չպետք է խաղա, այստեղ պետությունն անելիք ունի, պետք է միջամտի ու գործիքակազմ կիրառի։
«Մենք պետք է թափանցիկացնենք գործիքակազմը՝ հասկանալու, թե ով է խաղում, ինչքան է խաղում։ Մենք պետք է հասցեականության հետ կապված հարցերը հետագայում բարձրացնենք։ Այդ դեպքում պետության սոցիալական քաղաքականությունը մեծ հաշվով կիրականանա»,- ասաց Պապոյանը։
ՔՊ-ական պատգամավոր Միքայել Թումասյանը հետաքրքրվեց՝ արդյոք կա՞ն հաշվարկներ, թե որքա՞ն կքչանա վիճակախաղերի վրա ծախսվող գումարը։
Ի պատասխան՝ Գևորգ Պապոյանն ասաց, որ եթե մեկ տարի առաջ խոսվում էր 1.5 տրիլիոն դրամի շրջանառության մասին, ապա այսօր խոսվում է 3.9 տրիլիոնի մասին, և եթե այս տրամաբանությունը շարունակվի, ապա մոտ ապագայում 4.5 տրիլիոն դրամի կհասնի այդ գումարը։
«Հիմա մեր խնդիրն է, որ սոցիալապես անապահով մարդը չկարողանա բուքմեյքերական ընկերություններում գումար ծախսել, և, օրինակ՝ այդ 10 հազար դրամը գնալու է իր տուն»,- նշեց Պապոյանը։
Նա նշեց, որ պետք է թափանցիկություն լինի, որ պարզ երևա, թե մարդիկ իրենց գումարն ինչի վրա են ծախսում։