Հարավային Կովկասում երկարատև և մեր ժողովրդի համար արժանապատիվ խաղաղության համար կենսական է ապահովել ուժի կիրառման և այլատյաց քաղաքականության բացառումը, քանզի մենք արդեն ականատես ենք դրա դրսևորմանը․ մեկ ամիս առաջ ԼՂ-ում ավարտին հասցվեց էթնիկ զտման քաղաքականությունը և ավելի քան 100 հազար հայեր բռնի տեղահանվեցին իրենց պատմական հայրենիքից և այժմ որպես փախստական ապաստան են գտել ՀՀ-ում։ Այդ մասին այսօր Հայաստանի և Հունգարիայի ԱԳ նախարարների մամուլի ասուլիսի ընթացքում ասաց ՀՀ ԱԳՆ Արարատ Միրզոյանը։
Ըստ Միրզոյանի՝ տարածաշրջանում հարատև խաղաղությունը պահանջում է տարածաշրջանի բոլոր երկրների հանձնառություն և հրաժարում առավելապաշտական նկրտումներից։
«Դա հնարավոր է անել, հնարավոր է հասնել Ադրբեջանի և Հայաստանի միջև կայուն խաղաղության, եթե միանշանակ լինի Հայաստանի և Ադրբեջանի տարածքային ամբողջականությունը և իրականացվի դելիմիտացիա՝ 1991 թվականի Ալմա Աթիի հռչակագրի և ԽՍՀՄ ամենաթարմ քարտեզների հիման վրա»,- նշեց նա։
Միրզոյանը նկատեց՝ պատահական չէ, որ հենց այս ուղենիշներն են արտացոլում գտել Գրանադայում ընդունված քաղակողմ հայտարարության մեջ, որին ՀՀ-ն ակնկալում է նաև մյուս միջազգային գործընկերների աջակցությունը։
«Իհարկե, կարևոր է նաև ԼՂ ժողովրդի իրավունքների հասցեագրումը և ԼՂ-ում թողնված հարուստ հայկական ժառանգության պահպանման հարցի հասցեագրումը»,- շեշտեց Արարատ Միրզոյանը։
Մանրամասները՝ տեսանյութում