Երկու օրից սեպտեմբերի 21-ն է՝ ՀՀ անկախության օրը։ Օր, որին տարիներ առաջ մեծ շուքով ու ոգևորությամբ էինք պատրաստվում, իսկ այժմ, ցավոք, քչերն են հիշում դրա գոյության մասին։ Պատճառը պարզ է․ մեր պետությունը պատերազմի մեջ է։

Այնուամենայնիվ, ինչ-որ բան նախատեսե՞լ էր անել ՀՀ կառավարությունը՝ օրվա առիթով, MediaHub.am-ը փորձեց ճշտել վարչապետի աշխակազմի լրատվության և հասարակայնության կապերի վարչության պետք Արմեն Խաչատրյանից։

Նա նշեց, որ սեպտեմբերի 21-ին նախատեսված էր «Մեր ժամանակների հերոսը» խորագրով մրցանակաբաշխությունը, սակայն, հասկանալի պատճառներով այն անհայտ ժամկետով հետաձգվել է։

«Դե պարզ է, որ հիմա չէինք կարող անել»,- նշեց նա։

Հարցին, թե նախատեսվո՞ւմ է Փաշինյանի այցը «Եռաբլուր» զինվորական պանթեոն, Խաչատրյանը պատասխանեց՝ այո։

«Այց լինելու է, բայց չգիտենք, թե որ ժամին»,- ասաց Խաչատրյանը։

Հիշեցնենք, որ նախորդ տարիներին Փաշինյանի այցի ժամանակ լրագրողների մուտքը պանթեոն արգելվում էր, նրանց համար սահմանվում էր հստակ տարածք, որտեղից տեղաշարժվել չէր կարելի։ Այս տարին նման խնդիր կառաջանա՞. այս պահին հստակ չէ։

Դիտարկմանը, որ համաձայն գործող կարգի, «Եռաբլուրում» նկարահանումներ իրականացնելու մասով պետք է դիմել ՊՆ-ին, արդյո՞ք այդ օրն էլ է նման խնդիր առաջանալու, և Փաշինյանի այցը լուսաբանելու համար պետք է դիմել պաշտպանական գերատեսչությանը, Արմեն Խաչատրյանն առաջարկեց դիմել ՊՆ-ին։ 

ՊՆ-ից էլ մեզ հետ զրույցում ասացին, որ նկարահանումների մասին անհրաժեշտ է նախապես իրազեկել պաշտպանության նախարարությանը, և որ  գերատեսչությունը լուսաբանման առումով արհեստական խոչընդոտներ չի ստեղծում:

Նարե Գնունի