Մոսկվան կոչ է անում Բաքվին և Երևանին հնարավորինս արագ վերսկսել ռիթմիկ աշխատանքը հայ-ադրբեջանական հարաբերությունների կարգավորման ուղղությամբ, ասել է ՌԴ ԱԳՆ պաշտոնական ներկայացուցիչ Մարիա Զախարովան, փոխանցում է ՌԻԱ Նովոստին։
Նրա խոսքով՝ Ռուսաստանը հետևողականորեն նպաստում է հայ-ադրբեջանական հարաբերությունների կարգավորմանը և ջանքեր է գործադրում միջանցքի շուրջ ստեղծված իրավիճակի կարգավորման համար։
«Ռուսական կողմը հետևողականորեն նպաստում է հայ-ադրբեջանական հարաբերությունների կարգավորմանը, ՌԴ պաշտպանության նախարարությունը և ռուսական խաղաղապահ զորախումբը, ԱԳՆ-ի հետ սերտ համագործակցությամբ, եռանդուն ջանքեր են գործադրում Լաչինի միջանցքի շուրջ ստեղծված իրավիճակի կարգավորման համար: Բաքվի և Երևանի մեր գործընկերներին կոչ ենք անում վերսկսել ռիթմիկ համատեղ աշխատանքը երկկողմ հարաբերությունների կարգավորման ուղղություններից յուրաքանչյուրի ուղղությամբ»,- չորեքշաբթի ճեպազրույցում ասել է Զախարովան։
Զախարովան տեղեկացրել է, որ ռուս խաղաղապահները բարեգործական կազմակերպությունների հետ միասին առաքում են մարդասիրական պարագաներ, օգնություն է ցուցաբերվել 8000 երեխայի և 800 անապահով ընտանիքի։
«Որքան էլ լարված իրավիճակ լինի տարածաշրջանում` բանակցային գործընթացների սառեցումն անարդյունավետ է: Մոսկվան կոչ է անում արագ վերսկսել բանակցությունները, այդ թվում՝ փոխվարչապետների՝ տարածաշրջանային հաղորդակցությունների ապաշրջափակման աշխատանքային խմբի շրջանակում։ Ռուսական կողմը նույնպես պատրաստ է աջակցել ԱԳ նախարարների մակարդակով բանակցությունների նոր փուլերի անցկացմանը»,-նշել է նա։
«Բաքվի և Երևանի հետ երկխոսության ընթացքում մենք շարունակում ենք փոխընդունելի լուծումների որոնումը, որոնք կօգնեն վերականգնել Լաչինի միջանցքի լիարժեք գործունեությունը՝ համաձայն Ռուսաստանի, Ադրբեջանի և Հայաստանի ղեկավարների 2020 թվականի նոյեմբերի 9-ի հայտարարությունների և բարելավելու հումանիտար իրավիճակը Լեռնային Ղարաբաղում»,- հավելել է ԱԳՆ ներկայացուցիչը։