ԱԺ «Պատիվ ունեմ» խմբակցության պատգամավորները հայտարարել են խորհրդարան վերադառնալու և ԱԺ-ում աշխատանքները շարունակելու մասին։ Միաժամանակ, «Պատիվ ունեմ»-ից հայտնել են, որ իրենք շարունակելու են նաև փողոցային պայքարը։
Ըստ մամուլի հրապարակումների՝ խորհրդարան վերադառնալու քննարկումներ տեղի են ունենում նաև Ռոբերտ Քոչարյանի ղեկավարած «Հայաստան» դաշինքում։ Ըստ ամենայնի, խորհրդարան վերադառնալու որոշում կկայացնի նաև ամենամեծ ընդդիմադիր խմբակցությունը, թեև Իշխան Սաղաթելյանն ու Վահե Հակոբյանը հրապարակավ դեմ են արտահայտվել նման որոշմանը: Ընդդիմության նման որոշումը բազմաշերտ քննարկման, վերլուծության անհրաժեշտություն ունի:
Չնայած այդ մասին բարձրաձայն չի ասվում, բայց ակնհայտ է, որ սպառված է իշխանափոխության, այսպես կոչված, բլիցկրիգային տարբերակը, իսկ այս պարագայում խորհրդարան չվերադառնալու այլընտրանքը մանդատները վայր դնելն է, մանավանդ, որ փողոցը, մեղմ ասած, ակտիվ չէ: Սա, թերևս, ընդդիմության՝ խորհրդարան վերադառնալու առաջին մոտիվն է:
Մյուս կողմից, մոտենում է հունվարը ու գործնականում հնարավոր է, որ այս անգամ իշխանությունները «բարի» չգտնվեն ու ընդդիմադիր պատգամավորներին զրկեն մանդատներից՝ բացակայության հիմքով: Ընդդիմադիր պատգամավորները ցանկանում են կանխել նման սցենարը՝ չնայած այնքան էլ փաստ չէ, որ նրանց խորհրդարանական գործունեությունը կարող է արդյունավետ լինել: Եվ վերջապես՝ հայ- ադրբեջանական հարաբերությունների գործընթացը մոտենում է մի հանգրվանի, որտեղ հնարավոր է պայմանագրի ստորագրում ու դրա քննարկում խորհրդարանում, իսկ այս պարագայում ընդդիմության բացակայությունը, մեղմ ասած, պատճառաբանված չի լինելու:
Իհարկե, գլոբալ առումով՝ ներկա ընդդիմությունը գտնվում է խորը քաղաքական և ինստիտուցիոնալ ճգնաժամի մեջ ու այլևս նոր՝ ավելի արդյունավետ ձևաչափեր ձևավորելու անհրաժեշտություն կա:
Վահրամ Բագրատյան