Նախ, ինձ հրավիրել են, ես չեմ որոշել գալ։ Այդ մասին այսօր ԱԺ-ում լրագրողների հետ զրույցում ասաց Արցախի ԱԽ նախկին քարտուղար Սամվել Բաբայանը, որ եկել է մասնակցելու 44-օրյա պատերազմի հանգամանքները քննող հանձնաժողովի նիստին։
Հիշեցնենք, որ հանձնաժողովի նախագահ Անդրանիկ Քոչարյանն էր հայտարարել, որ Սամվել Բաբայանը ցանկություն է հայտնել մասնակցել հանձնաժողովի նիստին։
Հարցին, թե արդյո՞ք նոր ասելիք ունի, Սամվել Բաբայանը պատասխանեց. «Տեսնենք, թե ինչ հարցեր կտան»։
Դիտարկմանը, որ ինքը հանձնաժողովի աշխատանքներում ներգրավված էր, ապա դուրս եկավ՝ նշելով, որ խաղի կանոնները փոխվել են, Արցախի ԱԽ նախկին քարտուղարն արձագանքեց, որ ինքը խնդրել էր հետ գնալ ու ամբողջովին ստուգել անցած քսան տարին, թե ինչից ենք սկսել ու ուր ենք հասել։
«Մերժվեց այդ առաջարկը։ Իսկ հիմա ես չեմ մասնակցում, հրավիրել են։ Իսկ ինչի՞ պիտի խուսափեմ, որ պատրաստ եմ պատասխանել»,- նշեց նա։
Սամվել Բաբայանը վստահեցրեց, որ անկեղծ է պատասխանելու այն հարցերին, որոնք իրեն կուղղվեն։
Բացի այդ, նա նկատեց, որ Արցախի հարցը չի լուծվել, ոչ մի ժամանակ էլ չի կարող լուծվել։
«Ես առաջարկել եմ կոմիտե ձևավորել, բայց քանի որ Արցախի իշխանությունն ու Հայաստանի ընդդիմությունը համարում են՝ ես խանգարում եմ իրենց պլանները, ձեռնպահ եմ մնացել»,- նշեց նա։
Հարցին՝ ինքը պատկերացնո՞ւմ է արցախահայերի վերադարձը, իշխանությունները որևէ քայլ անո՞ւմ են, Բաբայանը պատասխանեց՝ տեղյակ չէ, թե ինչ են անում իշխանությունները։
«Ես գիտեմ, թե ես ինչ եմ իրականացնում, բայց չեմ ասի»,- ասաց նա։
Անդրադառնալով իր հայտարարությանը, թե բլոկադայի ընթացքում ինքը բանակցում էր ադրբեջանցիների հետ, մինչդեռ Արցախի իշխանությունը հայտարարում է, որ իրեն նման մանդատ տրված չէր, Սամվել Բաբայանը նշեց․
«Ամեն մեկին մի՛ լսեք։ Քննություն է ընթանում։ Շահրամանյանին կհրավիրեն, կներկայացնեն ամեն բան։ Իսկ իմ հետ ոչ ոք չի բանակցել»։
Մանրամասները՝ տեսանյութում