Ե՛վ պետքարտուղար Էնթոնի Բլինքենը, և՛ Կովկասյան բանակցությունների հարցերով ավագ խորհրդական Լուիս Բոնոն շարունակում են խորը ներգրավված լինել Հայաստանի և Ադրբեջանի միջև հարաբերությունների կարգավորման գործընթացում։ Ճեպազրույցի ընթացքում հայտարարել է Միացյալ Նահանգների պետական քարտուղարության խոսնակի տեղակալ Վեդանտ Պատելը՝ անդրադառնալով Լուի Բոնոյի՝ տարածաշրջան կատարած այցին և դրա արդյունքներին։
Պատելը, պատասխանելով հուլիսի 30-ին հայ-թուրքական սահմանին տեղի ունենալիք ԱԺ փոխնախագահ, Թուրքիայի հետ հարաբերությունների կարգավորման գործընթացում Հայաստանի հատուկ ներկայացուցիչ Ռուբեն Ռուբինյանի և թուրք հատուկ ներկայացուցիչ Սերդար Քըլըչի հանդիպման վերաբերյալ հարցին, ասել է․
«Կրկին, պարզապես կասեմ, որ դա մի բան է, որի վրա պետքարտուղարը կենտրոնացած է։ Եվ մենք կշարունակենք խորապես ներգրավված լինել»։