Ազգային ժողովի «Քաղաքացիական պայմանագիր» խմբակցության պատգամավոր, Պաշտպանության և անվտանգության հարցերի մշտական հանձնաժողովի անդամ Գագիկ Մելքոնյանը վերջին հարցազրույցում պնդել է, որ 44-օրյա պատերազմից հետո Ռուսաստանի Դաշնությունը Հայաստանին որևէ տեսակի զինատեսակ չի վաճառել, միայն խոստումներ են հնչել, որոնք այդպես էլ իրականություն չեն դարձել։
MediaHub.am-ը փորձեց այս հարցի վերաբերյալ տեղեկատվություն ստանալ պաշտպանության նախարարությունից, որտեղից հորդորեցին հարցը գրավոր ուղարկել, սամնաված կարգով կպատասխանեն։
MediaHub.am-ը զրուցեց նաև ՀՀ ԶՈՒ ԳՇ նախկին պետ Արտակ Դավթյանի հետ։ Մեր հարցին՝ արդյոք 44 օրյա պատերազմից հետո ՌԴ-ն մեզ որևէ զենք վաճառել է թե՝ ոչ, կամ շարունակել է եղած պայմանագրերի շրջանակում զենքի մատակարարումը, Արտակ Դավթյանն ասաց․ «Եղել են, բայց դիմեք պաշտպանության նախարարությանը։ Գաղտնիություն պարունակող տեղեկատվություն է, ես իրավասու չեմ հրապարակելու։ Կրկնում եմ՝ դիմեք պաշտպանության նախարարությանը»,-ասաց նա։
MediaHub.am-ը կապ հաստատեց նաև ԱԺ Պաշտպանության և անվտանգության հարցերի մշտական հանձնաժողովի նախագահ Անդրանիկ Քոչարյանի հետ, վերջինս նշեց, որ հեռախոսով մեկնաբանություններ չի տալիս։
MediaHub.am-ի հետ զրույցում ԱԺ Պաշտպանության և անվտանգության հարցերի մշտական հանձնաժողովի անդամ, «Հայաստան» խմբակցության պատգամավոր Գեղամ Մանուկյանն էլ ասաց, որ հանձնաժողվի անդամների համար գաղտնի տեղեկատվությունը հասանելի է, բայց հրապարակման ենթակա չէ.
«Գագիկ Մելքոնյանի հայտարությամբ պետք է զբաղվեն իրավապահները, հանցակազմ է պարունակում»,-շեշտեց նա։
Հիշեցնենք, որ Մոսկվայում անցկացվող «Армия-2021» ռազմաարդյունաբերական ցուցահանդեսի շրջանակում Հայաստանը սպառազինության մատակարարման պայմանագիր էր կնքել ռուսաստանյան ընկերությունների հետ։ Այս մասին հայտնել էր Ռուսաստանի Ռազմատեխնիկական համագործակցության դաշնային ծառայության տնօրեն Դմիտրի Շուգաևը։ Այն ժամանկվա պաշտպանության նախարար Արշակ Կարապետյանն էլ Մոսկվա կատարած այցի ընթացքում, ըստ պաշտոնական տեղեկատվության, իր գործընկերոջը դաշույն էր նվիրել, ՌԴ պաշտպանության նախարար Սերգեյ Շոյգուն էլ հայտարարել էր.
«Կարող ենք համարել, որ Հայաստանին սպառազինության մատակարարման գործընթացը մեկնարկած է»։ Թե ինչ զենքերի մասին է խոսքը՝ չէր մանրամասնվում, սակայն նշենք, որ իշխանության որոշ ներկայցուցիչներ խոսում էին հարվածային ուղղաթիռներ ձեռք բերելու մասին։
Անի Գևորգյան