Համբարձում Մաթեւոսյանի՝ փոխվարչապետի պաշտոնից ազատելվուց հետո, լուրեր շրջանառվեցին, որ Փաշինյանն այս պաշտոնին տեսնում է իր ամենահավատարիմներից մեկին՝ Ռոմանոս Պետրոսյանին։
Թեև MediaHub-ն այլ տեղեկություններ ունի այս պաշտոնին նշանակվող թեկնածուի մասով, այդուհանդերձ փորձեցինք պարզել՝ արդյո՞ք ՊՎԾ պետը հավակնում է դառնալ փոխվարչապետ, կամ նման առաջարկ ստացե՞լ է։
«Այս պահին նման քննարկում չկա»,- MediaHub-ի հետ զրույցում ասաց Ռոմանոս Պետրոսյանը։
Հիշեցնենք, որ մեր աղբյուրի համաձայն՝ առաջին փոխվարչապետի ամենահավանական թեկնածուն այս պահին ՀՀ Կառավարության աշխատակազմի ղեկավար Արայիկ Հարությունյանն է:
Ավելի վաղ գրել էինք, որ Նիկոլ Փաշինյանը՝ ներկուսակցական բախումները, սեփական վախերը հնարավորինս կոծկելու համար զգուշավորությամբ, առանց շտապելու պետական կառավարման համակարգում առանցքային պաշտոններ ունեցող Սուրեն Պապիկյանի թիմակիցներին հեռացնում է ասպարեզից։ Ամեն ինչ սկսվեց ՔՊ վարչության կեղծված ընտրությունից, որը, բնականաբար, անհետեւանք չէր մնալու։
Այսօր հայտնի դարձավ, որ մոտ երկու ամիս անց Փաշինյանը Պապիկյանի հավատարիմներից առաջինը «պատժում» է փոխվարչապետ Համբարձում Մաթեւոսյանին։ Նոյեմբերի սկզբին ՔՊ կուսակցության 6-րդ համագումարի ժամանակ նա վերցրեց պաշտպանության նախարար Սուրեն Պապիկյանի՝ կուսակցության ղեկավարի «տիտղոսը», այդպիսով ինքն իրեն ապահովագրելով «դասալիք» ՔՊ-ականներից։ Համբարձում Մաթեւոսյանի գլխին «սեւ ամպեր» էին կուտակվել դեռ վարչության կեղծված ընտրությունից հետո, երբ պարզ դարձավ, որ կուսակցության ներսում ներքին հրահանգ էր եղել ամեն ինչ անել, որ ՔՊ վարչության անդամությունում իր պատվավոր տեղը ունենա նաեւ Մաթեւոսյանը։
Ի դեպ, մինչ այս պահը Համբարձում Մաթևոսյանի հրաժարականի լուրը պաշտոնապես չի հաստատվել:
Լիա Սարգսյան