Գյուղատնտեսական աշխատանքները 100 տոկոսով չենք կարողանում իրականացնել, այնպես չէ, որ ոչինչ անել չենք կարողանում, բայց վառելիքի բացակայության պատճառով գյուղատնտեսական աշխատանքները կաղում են։ Այս մասին այսօր MediaHub-ի հետ զրույցում ասաց ԱՀ գյուղատնտեսության նախարար Գեորգի Հայրիյանը։

«Բացի ցորենից՝ ունենք տարբեր հացահատիկային արտեր, որոնք հնձել չենք կարողանում, օրինակ` գարին, հաճարը։ Չենք հասցնում բերքահավաք իրականացնել: Այս ամենից բացի, կան նաև ահազանգեր, որ կտավատ ունենք, որը պիտի քաղենք ու յուղ ստանանք, եգիպտացորեն ունենք, որի քաղելը մեծ օգուտ կտա, բայց ամեն ինչ կանգ է առնում միայն վառելիքի խնդրով պայմանավորված։ Նաև անձրևներն են խանգարում, քանի որ դաշտերում մեծ քանակի խոտեր են աճել, որոնք խանգարում են հացահատիկային բերքը հավաքելուն»,- նշեց Հայրիյանը։

Նախարարի խոսքով՝ փորձում են բանջարեղենների վաճառքը իրականացնել շրջիկ ավտոմեքենաներով, բայց սա էլ ոչ լիարժեք է կատարվում՝ կրկին վերևում նշված խնդրի պատճառով։

Հարցին, թե լուծումը որն է լինելու, վերջինս պատասխանեց․

«Բարդ է, լուծման մեխանիզմ չեմ տեսնում, քանի որ նույնիսկ աշնանացան իրականացնել չենք կարող, այն արդեն պետք է սկսած լինեինք, բայց այս պայմաններում հնարավոր չէ իրականացնել։ Նռան, խաղողի բերքահավաք է սպասվում, բայց այն դժվար կլինի իրականացնելը»,-ասաց նա։ 

Հայրիյանի պնդմամբ՝ Կոռնիձորում մնացած հումանիտար օգնությունը, բնականաբար, կմեղմի արցախցու հոգսերը, սակայն այն խնդիրները, որոնք առաջացել են գյուղատնտեսական ոլորտում, շտկվել չի կարող առանց վառելիքի պաշարի։

«Մինչև հունիսի 15-ը, այսինքն՝ մինչև պաշարումը, ռուս խաղաղապահների օգնությամբ հնարավոր էր լինում վառելիք հասցնել և մեր ունեցած պաշարները հենց դրա շնորհիվ էինք հավաքում»,- ներկայացրեց մեր զրուցակիցը։

Հարցին, թե արդյո՞ք Հայրիյանի համար իրատեսական է Աղդամի ճանապարհով ինչ-որ գործընթաց սկսելը, վերջինս պատասխանեց․ «Ինձ համար՝ ոչ»։

Լիաննա Թորոսյան