Ազգային ժողովի ընդդիմադիր «Հայաստան» խմբակցության նախկին պատգամավոր, Մեղրիի նախկին քաղաքապետ Մխիթար Զաքարյանը, որ Վահե Հակոբյանի գլխավորած «Վերածնվող Հայաստան» կուսակցության քվոտայով էր ցուցակում ընդգրկվել և մանդատ ստացել, 2022 թվականի հոկտեմբերի 4-ին վայր դրեց իր պատգամավորական մանդատը և դուրս եկավ քաղաքականությունից։ 

«Որոշում եմ կայացրել դադարեցնել պատգամավորական գործունեությունս՝ հայրենիքիս առավել արդյունավետ ծառայելու վճռականությամբ»,- իր որոշումն այսպես էր մեկնաբանել Զաքարյանը, որը մինչ այդ նաև հրապարակավ ներողություն էր խնդրել Նիկոլ Փաշինյանի տիկնոջից նրա հասցեին իր հարցազրույցներից մեկում արած որոշ արտահայտությունների համար։

Mediahub-ն այսօր հետաքրքրվեց Զաքարյանից, թե մանդատը դնելուց հետո ինչո՞վ է զբաղվում, ի՞նչ գործունեություն է ծավալում։

Զաքարյանն ասաց, որ զբաղվում է բիզնեսով, որը մի քիչ ճոխ կլինի բիզնես անվանել, և հիմնականում Մոսկվայում է գործունեություն ծավալում, հաճախակի այնտեղ է լինում ու երեկ է Մոսկվայից վերադարձել Երևան։ Քաղաքականությամբ չի զբաղվում ու անգամ մտածում է Հայաստանից հեռանալու և Մոսկվայում մշտական բնակություն հաստատելու մասին։

«Որ ճիշտն ասեմ, ուզում եմ ամեն ինչից դուրս գամ, որ ստացվի, ուզում եմ տեղափոխվել Հայաստանից»,- ասաց Զաքարյանը՝ իր հիասթափությունն արտահայտելով նաև սյունեցիներից, քանի որ ժողովրդի ճնշող մեծամասնությունը սպասում է, որ կա՛մ Սյունիքն էլ պիտի հանձնեն, կա՛մ սահմանները պիտի բացեն, որ առևտուր անեն ադրբեջանցիների ու թուրքերի հետ․ 
«Կարծում են, որ հեսա բացվեց, էն առաջվա կանաչի ծախող թուրքերն են գալու։ Իմ անձնական շփումներից զգում եմ, որ մարդիկ ապահովության զգացողությունը կորցրել են։ Իմ սուբյեկտիվ կարծիքով՝ տպավորություն է, որ հանուն ինչի, որ պայքարում էինք, էդ հանունը չկա։ Իրենք ուրիշ բան են ուզում, ոնց որ դու գնաս մարդկանց զոռով համոզես, որ «այ սա է ճիշտը»»։

-Բայց Դուք էլ պայքարից հրաժարվեցիք, հետ կանգնեցիք, գուցե սյունեցիները Ձեր պես գործիչների օրինակները տեսնելով՝ իրե՞նք էլ են հիասթափվում պայքարից, քանի որ տեսնում են՝ իրենց ընտրած մարդիկ կեսից հետ են կանգնում պայքարից։
-Ձեր ասած սյունեցին ընտրությունների արդյունքում գնաց 80 տոկոսով էլի այս իշխանություններին ձայն տվեց՝ իր բոլոր հետևանքներով։ Ես իմ համայնքի օրինակով ասեմ՝ 20 տոկոսն էր ընդամենը իմ մտքի, իմ գաղափարի։ Մտածում էինք պատահականություն է, թյուրըմբռնում է, բայց ինչքան անցնում է, համոզվում ենք, որ լավ էլ գիտակցված արել են իրենց ընտրությունը։

-Այսինքն՝ չե՞ն փոշմանել, որ ՔՊ-ին են ձայն տվել։ 
-Ես մի ամիս առաջ էլի, որ եկել էի Հայաստան, գնացել էի Մեղրի, ու ինձ, որ տեսնում են, ասում են՝ «արի, զիբիլը ուտում ա Ագարակը»։ Այսինքն՝ ինձ իրենց զիբիլ հավաքող են դիտարկում, էլի, ինձ տեսնում են, հիշում են, որ զիբիլը հավաքած չի։ Իրենց թվում է, թե կոմպլիմենտ են անում, լավ բան են ասում, որ «էս գործող քաղաքապետը լավ չի հավաքում զիբիլը, դու լավ էիր հավաքում», բայց դրանով ավելի են վիրավորում։

-Նիկոլ Փաշինյանի տիկնոջից ներողություն խնդրելուց հետո մանդատը դրեցիք ու դուրս եկաք, դրանից հետո Ձեզ հանգի՞ստ են թողել, թե՞ կա քաղաքական առումով լարվածություն, կամ ճնշումներ Ձեր բիզնեսների մասով։
-Չէ, անկեղծ ասած, չկա էդպիսի բան, և հետո, ես Հայաստանում էդպես մեծ բիզնես չունեմ էլ, փոքր բիզնես է, Հայաստանում չեմ էլ լինում, գործունեությունս ծավալում եմ Մոսկվայում, ո՞նց պիտի խանգարեն։

-Ի դեպ, ինչպես Ձեր մասով, այնպես էլ Սյունիքի նախկին ու ներկա այլ համայնքապետերի մասով ասում են, որ իշխանություններին հաջողվեց կոտրել ձեզ։ Քաջարանի քաղաքապետը Փաշինյանի տիկնոջը ծաղիկներով դիմավորեց, Դուք նրա տիկնոջից ներողություն խնդրեցիք, Գորիսի ու Կապանի համայնքապետերը լռեցին ու հիմա շատ լավ աշխատում են կառավարության հետ․․․  Ինչպե՞ս ստացվեց, որ «անկոտրում» սյունեցիներին կարողացան այդպես հեշտ «կոտրել»։
-Կոռե՞կտ եք համարում՝ ես իմ ընկերների արածը մեկնաբանեմ։ Եթե իմ մասով եք հարցնում, ապա մի քանի անգամ մեկնաբանել եմ, հիմա էլ կարող եմ կրկնել, որ դա էմոցիաների ազդեցության ու պահի տակ ասված բան էր, երբ որ ասոցացրին, որ նույն բանը, «եթե քո ընտանիքի հետ լիներ, ո՞նց կնայեիր դրան»։ Անկեղծորեն գտել եմ, որ սահմանն անցած եմ եղել ու զուտ էդ մասով էդ քայլն արել եմ։ Իսկ մյուսների մասով կարող եմ սուբյեկտիվ վերլուծություն անել, որ իրենք այդ համայնքի ղեկավար են, համայնքի աշխատանքներն առաջ տանելու համար գործող կառավարության հետ չհամագործակցելը ես չեմ պատկերացնում։ Կարող է կա էդպիսի տարբերակ, բայց ես չգիտեմ։

-Ամեն դեպքում համարո՞ւմ եք, որ քաղաքական առումով կոտրեցին Ձեզ՝ սյունեցիներիդ։
-Էս պահին դրա ի՞նչն է կարևոր կամ ակտուալ։ Եթե կան ավելի անկոտրում մարդիկ, խնդրեմ՝ թող հանդես գան։ Իսկ եթե ընդամենը մեր ազգի ճնշող մեծամասնությունը ուրիշ կարծիքի է, ապա ես մեկնաբանելու բան չեմ տեսնում։

-Դուք հիմա ամբողջությամբ քաղաքականությունից դո՞ւրս եք եկել և մանդատը դնելուց հետո Վահե Հակոբյանի ու նրա ղեկավարած «Վերածնվող Հայաստան» կուսակցության հետ կապ ունե՞ք։
-Մարդկայնորեն Վահե Հակոբյանի հետ ճանապարհ ենք անցել, նորմալ հարաբերություններ կան, բայց քաղաքական առումով չկա որևէ կապ։ Եթե զբաղվելու լինեի, չէի հայտարարի, որ «չեմ զբաղվում, դուրս եմ գալիս»։ Նույնիսկ այս հարցազրույցն էլ չէի տա, զուտ Ձեր հանդեպ հարգանքից դրդված համաձայնեցի խոսել, թե չէ ցանկություն էլ չունեի այսքան խոսելու, խորանալու։

-Ասացիք՝ մտադիր եք արտագաղթել, հեռանալ Հայաստանից։ Ընտանիքո՞վ եք մտադիր տեղափոխվել Մոսկվա։
-Այս պահին գործս էնտեղ է, աղջիկս Մոսկվայում է ավարտել, տղաներս փոքր են դեռ։ Բայց եթե ստացվի, իհարկե, էդպես եմ որոշել, որ ընտանիքով կտեղափոխվեմ։

Վահե Մակարյան