Ճապոնիայի էկոնոմիկայի, առևտրի և արդյունաբերության նախարարությունը պատրաստվում է ներդնել 2 տրիլիոն իեն (13 միլիարդ դոլար)՝ խթանելու տեղական կիսահաղորդիչների արտադրությունն ու զարգացումը: Գրել է Bloomberg-ը։
«Կիսահաղորդիչների հետ կապված համաշխարհային տնտեսական անվտանգության իրավիճակը գնալով ավելի լուրջ է դառնում։ Մենք մեծ հետաքրքրություն ենք տեսնում թե՛ արտասահմանյան, թե՛ տեղական ընկերությունների կողմից, որոնք ցանկանում են ներդրումներ կատարել Ճապոնիայում»,- հայտնել է նախարարությունը։
Ճապոնիան 1980-ականներին կիսահաղորդիչների առաջատար արտադրողն է եղել, սակայն այն ժամանակից ի վեր զիջել է դիրքերն այնպիսի խաղացողների նկատմամբ, ինչպիսիք են Թայվանը, Հարավային Կորեան և Չինաստանը։ Առայժմ «Սամուրայների երկիրը» ձգտում է վերահաստատվել շուկայում: Զարգացման կարևոր ոլորտներից մեկն ամենաառաջադեմ և ժամանակակից չիպերի մշակումն ու արտադրությունն է։
Անցյալ տարի հայտնի էր դարձել, որ Ճապոնիան և Միացյալ Նահանգները կստեղծեն համատեղ հետազոտական կենտրոն՝ 2 նմ պրոցեսի տեխնոլոգիայի օգտագործմամբ միկրոչիպերի նոր սերնդի մշակման համար: Ճապոնիայի իշխանությունները նաև համագործակցում են այնպիսի ընկերությունների հետ, ինչպիսիք են Թայվանի TSMC-ն և ամերիկյան Micron Technology-ը՝ նրանց տրամադրելով սուբսիդիաներ և գումարներ ներդնելով երկրում իրենց գործարանների կառուցման համար։