Պաշտպանության նախարարության շենքի մոտ 44–օրյա պատերազմում զոհված զինծառայողների ծնողները բողոքի ակցիա են անցկացնում. նրանք հանդիպում են պահանջում ՊՆ նախարար Սուրեն Պապիկյանի, ՊՆ փոխնախարար Արման Սարգսյանի ու 4-րդ գումարտակի հրամանատար Պավլիկ Քյարամյանի հետ։ Այս մասին լրագրողների հետ զրույցում հայտարարել է զոհված ժամկետային զինծառայող Ժորա Սահակյանի հայրը՝ Վահիդ Սահակյանը։

44-օրյա պատերազմի ժամանակ Մարտակերտում ծառայող նրանց որդիները ռազմական գործողությունների 27-րդ օրը տեղափոխվել են Մարտունի -2՝ Ուրյան լեռան բարձունքը պաշտպանելու։ Ծնողների խոսքով` դիրքերում իրենց որդիները մնացել են առանց հրամանատարի, բաց երկնքի տակ՝ անորոշ իրավիճակում, ինչի հետևանքով 34 զինծառայողները զոհվել են։

«Քյարամյանը պետք է պարզաբանի, թե ո՞ւմ հրամանով և ինչու տեղափոխությունը կատարվեց: Հոկտեմբերի 28-29-ին, երբ բոլորին նահանջի հրաման է տրվել, ինչո՞ւ մեր տղերքին նահանջ հրաման չի տրվել», – ասել է Սահակյանը:

Նրա խոսքով` զոհված զինծառայողների ծնողները չեն հանգստանալու, իրենց տները չեն գնալու այնքան ժամանակ, քանի դեռ այդ հարցերի պատասխանը չեն ստացել։