Լեհաստանի վարչապետ Մաթեուշ Մորավեցկին հայտարարել է, որ երկրի իշխանությունները պատրաստվում են նոտա ուղարկել Գերմանիա՝ ռեպարացիաների վճարման մասին բանակցություններ սկսելու առաջարկով։ Նրա խոսքով՝ Լեհաստանը պետք է փոխհատուցում ստանա Գերմանիայից, որպեսզի «լեհ-գերմանական հաշտությունն օրինակելի լինի», տեղեկացրել է ՏԱՍՍ-ը։

«Մենք Գերմանիա դիվանագիտական նոտա կուղարկենք եւ կոչ կանենք բանակցային գործընթաց սկսել։ Մենք կփորձենք հասնել դրան բոլոր հնարավոր հարթակներում, բոլոր հնարավոր ուղիներով»,- Մորավեցկուն մեջբերել է Լեհաստանի վարչապետի գրասենյակը։

«Որպեսզի լեհ-գերմանական հաշտությունը օրինակելի լինի, մեզ փոխհատուցումներ են հարկավոր, որովհետեւ առանց դրանց լեհ եւ գերմանացի ժողովուրդների միջեւ մշտապես անարդարության զգացողություն կլինի»,- ավելացրել է Մորավեցկին։

2017թ. Լեհաստանում ստեղծվել է հատուկ խորհրդարանական հանձնաժողով Գերմանիայից ռեպարացիաներ ստանալու հարցով։ Բեռլինը հայտարարել է, որ մտադիր չէ փոխհատուցումներ վճարել Լեհաստանին, քանի որ 1953թ. Վարշավան պաշտոնապես հրաժարվել է ռեպարացիաներից։ Սեպտեմբերի 1-ին Լեհաստանի իշխանությունները Գերմանիայից պահանջել են վճարել ռեպարացիաներ Երկրորդ համաշխարհային պատերազմի ժամանակ երկրի կրած կորուստների համար։ Ռեպարացիաների չափը Լեհաստանը գնահատել է 6,2 տրլն զլոտի (մոտ 1,3 տրլն դոլար), գրել է «Коммерсантъ»-ը։