Թաիլանդցի գիտնականները ստեղծել են Innovareef ցեմենտային կառուցվածքներ՝ մարջանային խութերի արագ վերականգնման համար: Այս մասին հաղորդվում է Չուլալոնգկորնի համալսարանի կայքում։
Իրատեսական արհեստական Innovareef խութերը պարունակում են բազմաթիվ ճյուղեր, որոնք նպաստում են պլանուլներով (մարջանի թրթուրներ) բնակեցմանը, ինչպես նաեւ ծակոտիներ, որոնք թույլ են տալիս դիմակայել մակընթացային ուժերին եւ ապաստաններ դառնալ ծովային բազմաթիվ տեսակների համար: Ցեմենտի կառուցվածքները գիտնականները ծածկել են կալցիումի եւ ֆոսֆատների շերտով։ Նրանց փորձերը ցույց են տվել, որ Innovareef-ի վրա նստած պլանուլները տարեկան մոտ 3-4 սանտիմետրով ավելի արագ են աճում, քան բնական խութերի վրա նստածները: Համեմատության համար, կոշտ մարջանների մեծ մասը տարեկան աճում է մոտ մեկ սանտիմետրով: Այսինքն՝ մեկ մետր տրամագծով կոշտ մարջան տեսնելու համար պետք է սպասել մի ամբողջ դար։
Մեքենայի անվադողերից, պոլիվինիլքլորիդից եւ ցեմենտի խորանարդիկներից պատրաստված արհեստական խութերի ստեղծման համար նախկին լուծումները չեն հարմարվել ստորջրյա բնությանը: Բացի այդ, այս արհեստական խութերը երբեմն քշվում են մակընթացային ուժերի կողմից, ծածկվում են ավազով կամ քայքայվելով վերածվում միկրոպլաստիկ աղբի։ Innovareef-ը հիմնված է Lego կոնստրուկտորի սկզբունքի վրա՝ հեշտությամբ հավաքվող եւ ապամոնտաժվող բլոկներ, որոնք հեշտացնում են կառուցվածքի տեղափոխումը:
Հետազոտական թիմը Innovareef-ի վրա տեղադրել է ծովային միջավայրի մոնիտորինգի սարքավորում, որպեսզի այն դառնա «խելացի կայան», որը կարող է, օրինակ, չափել ջրի ջերմաստիճանն ու թթվայնությունը, ինչպես նաեւ մակընթացային ուժերը: Այս ցուցանիշների մշտական մոնիտորինգը թույլ կտա ավելի արդյունավետ կերպով աճեցնել մարջանները:
Գլոբալ տաքացումը, որն առաջացրել է մարջանների գունաթափում, հանգեցրել է նրան, որ ծովերում խութերի միայն մեկ երրորդն է մնացել։ Դրանց ոչնչացումը ոչ միայն կկործանի ծովերի հարուստ էկոհամակարգերը, այլ նաեւ կարող է հանգեցնել նրան, որ ապագա սերունդները չունենան ծովային սննդի աղբյուրներ, սուզվելու վայրեր եւ զբոսաշրջությունից եկամտի կարեւոր աղբյուր: