Կույբիշևի շրջանային դատարանը 2 ամսով կալանավորել է Սանկտ Պետերբուրգում մետրոյի «Гостиный двор» կայարանի մուտքի մոտ ОМОН–ի աշխատակցի վրա կրակած 50-ամյա Տիգրան Խաչիկյանին։ Տեղեկությունը հայտնում է Պետերբուրգի միավորված դատարանների մամուլի ծառայությունը, փոխանցում է kommersant.ru-ն։
«Կույբիշևի շրջանային դատարանը բավարարել է ՌԴ քրեական օրենսգրքի 317–րդ հոդվածով (ոտնձգություն իրավապահ մարմնի աշխատակցի կյանքի նկատմամբ) նախատեսված հանցագործություն կատարելու մեջ մեղադրվող Տիգրան Խաչիկյանի նկատմամբ որպես խափանման միջոց կալանավորումն ընտրելու միջնորդությունը»,– ասված է հաղորդագրությունում։
Ավելի վաղ գրել էինք, որ Սանկտ Պետերբուրգի կենտրոնում հարձակվել են հատուկ նշանակության ջոկատի (ОМОН) աշխատակցի վրա, նա հոսպիտալացվել է։ Տեղեկությունը հրապարակվել է Ռուսաստանի քննչական կոմիտեի Telegram-յան ալիքում։
Աղբյուրը մանրամասնում է, որ տղամարդու մոտ հայտնաբերվել է երկու պոմպային որսորդական հրացան, պարկուճ, երկու Մոլոտովի կոկտեյլ և երաժշտական բարձրախոս:
Նախնական տվյալներով՝ առավոտյան 50-ամյա Տիգրան Խաչիկյանը, իր հետ վերցնելով երկու պոմպային որսորդական հրացան, պարկուճ, նախապես պատրաստված երկու Մոլոտովի կոկտեյլ և երաժշտական բարձրախոս, նստել է տաքսի և գնացել մետրոյի «Պրոսպեկտ Վետերանով» կայարան: Այնտեղ նա նստել է մեկ այլ մեքենա և ուղևորվել դեպի Սադովայա փողոց, այնուհետև քայլել դեպի մետրոյի «Գոստինի դվոր» կայարան։
Մուտքից ոչ հեռու տղամարդը հանել է բարձրախոսն ու միացրել երաժշտությունը, ինչն էլ գրավել է ՕՄՕՆ-ի ծառայողների ուշադրությունը։ Հանգամանքները պարզելու համար նրանք մոտեցել են տղամարդուն, ինչից հետո Խաչիկյանը բղավել է՝ «փախե՛ք»։ ՕՄՕՆ-ի աշխատակիցներից մեկը փորձել է բերման ենթարկել հարձակվողին, սակայն վերջինս հանել է որսորդական հրացանը և մի քանի անգամ կրակել տուժողի վրա։
«1972 թվականին ծնված տղամարդու նկատմամբ հարուցվել է քրեական գործ ՌԴ քրեական օրենսգրքի 317-րդ հոդվածով նախատեսված հանցագործության հատկանիշներով (ոտնձգություն իրավապահ մարմնի աշխատակցի կյանքի նկատմամբ)»,- ասված է հաղորդագրության մեջ:
Նշվում է, որ հարձակվողը ձերբակալվել է։
Ռուսական ԶԼՄ-ների տվյալներով՝ հարձակվողը 50-ամյա Տիգրան Խաչիկյանն է Ուզբեկստանից, գրանցված է Սանկտ Պետերբուրգում։
Տեսանյութն՝ այստեղ