SHAMSHYAN.com-ի տեղեկություններով՝ առաջիկայում Հայաստանի քննչական կոմիտեի Երևան քաղաքի քննչական վարչության «Զվարթնոց» գծային բաժնի քննիչի որոշմամբ ծանուցում պետք է ուղարկվեր «Ուժը հայրենյաց» կուսակցության նախագահ Տիգրան Արզաքանցյանի բնակության վայր, որպեսզի վերջինս իր տիկնոջ՝ Նատալյա Արզաքանցյանի հետ ներկայանար քննչական բաժին։
Այսօր, սակայն, Տ. Արզաքանցյանը, չսպասելով ծանուցագրին, իր տիկնոջ հետ թիկնապահներով գնացել է «Զվարթնոց» քննչական բաժին ու պատրաստակամություն հայտնել՝ ցուցմունք տալու հունվարի 26-ին Փարիզ-Երևան չվերթի ժամանակ ինքնաթիռում, ըստ իր հայտնածի, իր նկատմամբ սպանության սպառնալիք տալու փաստով նախաձեռնված քրեական վարույթի շրջանակում։
Տ. Արզաքանցյանը իր տիկնոջ հետ մոտ 1 ժամից ավելի եղել է քննչական բաժնում։ Նա պնդել է իր՝ նախկինում տված ահազանգը, ինչի համար էլ պետք է առերեսում տեղի ունենար, սակայն այսօր այն չի կատարվել։
Ավելի վաղ հայտնել էինք, որ SHAMSHYAN.com-ի տեղեկություններով՝ Հայաստանի քննչական կոմիտեի Երևան քաղաքի քննչական վարչության «Զվարթնոց» օդանավակայանի քննչական բաժնում սպանության սպառնալիք հատկանիշներով նախաձեռնվել էր քրեական վարույթ Ռուսաստանի Դաշնության քաղաքացի՝ 57-ամյա Արտաշես Իկոնոմովի նկատմամբ։
Ինչպես հայտնել էր ֆոտոլրագրողը, վերջինիս դեմ հունվարի 26-ին ահազանգ էր հնչեցրել Գավառ քաղաքում հաշվառված, Երևանում բնակվող 57-ամյա Տիգրան Արզաքանցյանը, որ այդ օրը Փարիզ-Երևան 1060 չվերթով իր կնոջ` Նատալյա Արզաքանցյանի հետ ժամանել է Հայաստան, ու օդանավի մեջ իրենց է մոտեցել իր ծանոթ Ա․ Իկոնոմովը և իրեն հարցրել է, թե երբ է պատրաստվում տարիներ շարունակ չվճարած պարտքերը վերադարձնել։
Գ․ Շամշյանի տեղեկություններով՝ օդանավից իջնելուց հետո Տ․ Արզաքանցյանին դիմավորելիս էին եղել զրահապատ՝ BMW մակնիշի և Range Rover մակնիշի ավտոմեքենաներ։
Տ․ Արզաքանցյանը կնոջը զրահապատ BMW-ով ասել էր, որպեսզի տանեն Մոնումենտի տուն, իսկ ինքը Range Rover մակնիշի ավտոմեքենայով մոտեցել էր ՀՀ Ներքին գործերի նախարարության Ոստիկանության «Զվարթնոց» օդանավակայանի բաժին ու կատարվածի մասին իր բողոքը գրել էր թղթին և հանձնել ոստիկաններին։
«Զվարթնոց» օդանավակայանի ոստիկանները արդեն օդանավակայանում մոտեցել էին Ա․ Իկոնոմովին և նրան հրավիրել գծային բաժին, որտեղ մի քանի ժամ մնալուց հետո նրան տեղափոխել էին «Զվարթնոց» օդանավակայանի քննչական բաժին։
Քննիչի որոշմամբ Ա․ Իկոնոմովը բաց էր թողնվել։
SHAMSHYAN.com-ի տեղեկություններով՝ առաջիկա 1-2 օրվա ընթացքում պետք է առերեսում կատարվեր Տ․ Արզաքանցյանի, նրա տիկնոջ՝ Ն․ Արզաքանցյանի և Ա․ Իկոնոմովի միջև։
Գ․ Շամշյանի տեղեկություններով՝ Տ․ Արզաքանցյանը ոստիկաններին և քննիչներին հայտնել էր, որ ինքը «Ուժը հայրենյաց» կուսակցության նախագահն է, իսկ ոստիկաններն ու քննիչները պարզել էին, որ Ա․ Իկոնոմովը «Գլոբալ Դիջիթել Ֆայնենս» ՓԲԸ խորհրդի անդամ է։