Ադրբեջանի նախագահ Իլհամ Ալիևը Հայաստանի և Ադրբեջանի միջև հարաբերությունների կարգավորման հարցով Ռուսաստանի ԱԳՆ հատուկ ներկայացուցիչ Իգոր Խովաևի հետ քննարկել է երկու երկրների միջև խաղաղության պայմանագրի նախապատրաստումը և բանակցությունների ընթացքը, հաղորդում են ադրբեջանական ԶԼՄ-ները:

Ըստ աղբյուրի՝ Խովաևը Ադրբեջանի նախագահին տեղեկացրել է տարածաշրջան կատարած իր այցի, Հայաստանի ու Ադրբեջանի միջև խաղաղության պայմանագրի նախապատրաստման բանակցային գործընթացին աջակցելու նպատակով Ռուսաստանի կողմից ձեռնարկված քայլերի մասին:

Ավելի վաղ Իգոր Խովաևը այցելել էր Հայաստան։ Վարչապետ Նիկոլ Փաշինյանը Խովաևի հետ քննարկել էր Ադրբեջանի կողմից Լաչինի միջանցքի ապօրինի շրջափակման հետևանքով Լեռնային Ղարաբաղում ստեղծված հումանիտար ճգնաժամը և դրա հաղթահարմանն ուղղված քայլերը: