ՀՅԴ անդամ, «Հայաստան» դաշինքի անդամ, պատգամավոր Թադևոս Ավետիսյանի օգնական Գերասիմ Վարդանյանի նկատմամբ քննիչը որպես խափանման միջոց է ընտրել գրավը՝ 60 միլիոն ՀՀ դրամի չափով, «Փաստինֆո»-ին հայտնել է փաստաբան Բենիկ Գալստյանը։
Հիշեցնենք՝ Գերասիմ Վարդանյանը ձերբակալվել էր մայիսի 2-ին, Երևանում իրականացվող անհնազանդության ակցիաների ընթացքում։ Ձերբակալությունը, սակայն, վերաբերում է դեռևս 2020 թվականի կապիտուլյացիոն ակտի ստորագրումից հետո իրականացված լայնածավալ բողոքի ակցիաներին։ Այն ժամանակ ևս Գերասիմ Վարդանյանը ձերբակալվել էր, ԱԱԾ-ն միջնորդություն էր ներկայացրել՝ նրան կալանավորելու մասին, ինչը մերժվել էր։
Մոտ երկու տարի անց ԱԱԾ քննիչը փոխել է Վարդանյանին առաջադրված մեղադրանքը և կրկին միջնորդություն ներկայացրել նրան կալանավորելու մասին։
Երևանի ընդհանուր իրավասության դատարանը՝ դատավոր Արշակ Մաթևոսյանի նախագահությամբ, երեկ մերժել է կալանավորման միջնորդությունը՝ խափանման միջոցի ընտրությունը թողնելով քննիչի հայեցողությանը, Վարդանյանն ազատ է արձակվել հենց դատական նիստերի դահլիճից։
Այսօր ԱԱԾ քննիչը նույն գործի շրջանակներում Գերասիմ Վարդանյանի նկատմամբ որպես խափանման միջոց է կիրառել 60 միլիոն դրամի չափով գրավը, որը, սակայն, վճարելու համար Վարդանյանը միջոցներ չունի։ Չի բացառվում, որ գրավի 60 միլիոն դրամի չափ է սահմանվել՝ գրավը չվճարելու պայմաններում հետագայում Վարդանյանին կալանավորելու հարցը բարձրացնելու համար։
«Գերասիմ Վարդանյանն ունի երկու մանկահասակ երեխա, որոնք իր խնամքին են, ունի հաշմանդամություն ունեցող եղբայր, որն իր խնամքին է, Գերասիմ Վարդանյանն աշխատում է ԱԺ-ում, ստանում է առավելագույնը 200 000 դրամ աշխատավարձ, ունի վարկեր, չունի արժեքավոր գույք՝ իր տիրապետման կամ տնօրինման տակ։ Այս գրավն այն չափի է, որ նա չկարողանա վճարել, այս գործողությունը ներառում է պատժի տարրեր, ինչն արգելված է թե՛ Սահմանադրությամբ, թե՛ ՄԻԵԴ, Վճռաբեկ դատարանի նախադեպերով»,- նշել է փաստաբան Գալստյանը։