Մենք բոլորս ԱԺ-ում ենք լինելու այսօր, բայց ընդդիմադիրների հրավիրած արտահերթ նիստին, չեմ կարծում, որ կմասնակցենք։ Այս մասին այսօր MediaHub.am-ի հետ զրույցում ասաց «Քաղաքացիական պայմանագիր» խմբակցության պատգամավոր Նարեկ Բաբայանը։
Հիշեցնենք, որ այսօր խորհրդարանական ընդդիմությունը Ֆրանսիայի հրապարակից ԱԺ կվերադառնա՝ արտահերթ նիստ անելու իր օրակարգով։ Իշխող մեծամասնությունն արդեն հայտարարել է, որ չի մասնակցի ընդդիմության նախաձեռնած նիստին։
Դիտարկմանը, որ հանրությունը ևս սպասում է, որ ընդդիմությունն ու իշխանությունը ընդհանուր հայտարարի կգան՝ պատգամավորը պատասխանեց՝ հանրությունն անցած տարի քվեարկել է, իր կարծիքն է ասել և այսօր, ըստ նրա, ոչինչ չի փոխվել։
«Այս ընդդիմությունը բոլոր հնարավորություններն ունեցել է բողոքի ակցիաների, այդ բոլոր հնարավորությունները մսխել է»,-ասաց նա։
Հարցին, թե ամեն դեպքում հարցեր չկա՞ն, որ պետք է ընդդիմության հետ քննարկել՝ Բաբայանը պատասխանեց՝ շատ հարցեր կան, բայց ընդդիմությունը պետք է մի կողմ դնի իր հռետորաբանությունն ու ԱԺ վերադառնա՝ աշխատանքային հարցեր քննարկելու։
Դիտարկմանը, թե ընդդիմության օրակարգի առաջնային հարցը Արցախն է, վերջինս պատասխանեց․ «Այն օրակարգը, որ իրենք ներկայացրել են, չի բխում ՀՀ-ի շահերից, կաշկանդում է ՀՀ-ի բանակցողներին և մենք չենք պատրաստվում իրենց անհեթեթ պահանջները կատարել։ Սա օրակարգ չի, ցնդաբանություն է։ Ինչպես օրինակ՝ թղթեր են ճարում, ԱԺ ներկայացնում, թե ինչու են բացակայում նիստերից, գուցե, մանդատն ամեն դեպքում նրանց համար շատ կարևոր է, եթե շատ կարևոր է, թող այդ օրակարգերը դնեն մի կողմ և գան աշխատանքի։ Մի կողմից ասում են՝ մանդատը կարևոր չի, մի կողմից էլ թղթեր են ուղարկում, թե ինչով են հիմնավորում իրենց բացակայությունը։ Իսկ հանրությունն այս մասին ի՞նչ է կարծում»։
Լիաննա Թորոսյան