ԵՄ-ն կփորձի համաձայնության հասնել գազի բարձր գների դեմ պայքարի հարցով. գրում է Reuters-ը։
Եվրամիության էներգետիկայի նախարարները չորեքշաբթի օրը կհանդիպեն Պրահայում՝ քննարկելու իրենց հետագա քայլերը:
ԵՄ երկրներից շատերն ասում են, որ հաջորդը պետք է լինի գազի գնի շեմը, սակայն տարակարծիք են, թե արդյոք այն պետք է կիրառվի գազի բոլոր գործարքների, երկարաժամկետ պայմանագրերի կամ պարզապես էլեկտրաէներգիայի արտադրության համար օգտագործվող գազի նկատմամբ։ Մյուսները, այդ թվում՝ Գերմանիան, դեռեւս դեմ են։
ԵՄ բարձրաստիճան պաշտոնյայի խոսքով՝ չորեքշաբթի օրը կայանալիք հանդիպումը պետք է սահմանափակի տարբերակները, որպեսզի Եվրահանձնաժողովը կարողանա նոր օրենք առաջարկել այս ամիս: «Անդամ երկրներն օգտագործում են նույն բառերը, պարտադիր չէ, որ նույն իմաստով, այնպես որ մենք պետք է նեղացնենք շրջանակը»,-ասել է նա։
Չորեքշաբթի օրը նախարարները կքննարկեն նաեւ երկրների միջեւ գազի համատեղ գնումները եւ ոչ ռուս մատակարարների հետ գնի նվազեցման շուրջ բանակցությունների հնարավորությունը, որպեսզի ԵՄ-ն կարողանա էներգակիրների գներն իջեցնել։
Չեխիան, որը ներկայումս նախագահում է ԵՄ-ում, նոյեմբերին կհրավիրի էներգետիկայի նախարարների արտակարգ հանդիպում՝ առաջարկությունները հաստատելու համար, ասել է պաշտոնյան։