ՀՀ վարչապետ Նիկոլ Փաշինյանի որդու՝ Աշոտ Փաշինյանի առևանգման մեջ կասկածվող զոհված զինվորի մայրը՝ տիկին Գայանեն հացադուլ է հայտարարել։ Այս մասին լրագրողների հետ զրույցում ասաց ԱԺ «Հայաստան» խմբակցության պատգամավոր Ագնեսա Խամոյանը։
«Տիկին Գայանեն հացադուլ է հայտարարել։ Սպասում է առերեսմանը և իր համար անհասկանալի է, թե ինչու է գործընթացն ուշանում»,– նշեց պատգամավորը։
Ավելի վաղ հայտնի էր դարձել, որ Գայանե Հակոբյանի առողջական վիճակը և ինքնազգացողությունը վատացել էր, քանի որ ձերբակալումից հետո սնունդ չէր ընդունել։
Պատգամավորը հայտնել է,որ տիկին Գայանեն իրեն թույլ էր զգում։
«Աշոտին առեւանգելու նպատակ չի ունեցել, հակառակ դեպքում մեքենայի ընթացքի ժամանակ կարգելափակեր դռները եւ միայնակ չէր լինի։ Աշոտի հետ հանգիստ խոսել են, եւ իր համար անսպասելի զրույցի կեսից Աշոտը իրեն նետել է մեքենայից, անգամ չի առաջարկել կանգնեցնել մեքենայի ընթացքը։ Չնայած այս ամենին, տիկին Գայանեն վստահ է, որ Աշոտի մոտ թյուրըմբռնում է եղել եւ առերեսման ժամանակ ամեն ինչ կբացահայտվի»։