Ճապոնական Հոկայդո նահանգի Սապորո քաղաքի սրճարաններից մեկն աշխատանքից ազատել է մատուցողուհուն այն պնդումներից հետո, թե նա իր արյունն է ավելացրել հաստատության հյուրերի համար պատրաստած կոկտեյլներին: Այս մասին հայտնում է WION-ը։

Mondaiji սրճարանի ներկայացուցիչները Twitter-ում հայտնել են, որ մատուցողուհիներից մեկը կորցրել է աշխատանքը՝ իր արյունը հաճախորդների համար պատրաստած կոկտեյլների մեջ խառնելու սովորության պատճառով։ Խմիչքների մեջ ամենից հաճախ մրգեր կամ այլ գունավոր օշարակներ են եղել։ «Նման գործողությունը ոչնչով չի տարբերվում  ահաբեկչությունից և միանգամայն անընդունելի է», - գրված է սրճարանի էջում։

Երբ դեպքի մասին հայտնի է դարձել, սրճարանը մեկ օրով փակվել է՝ խմիչքի բոլոր բաժակները փոխարինելու համար։ Ազատված մատուցողուհու անունը չի հրապարակվում։ Սրճարանը սոցցանցերում իրեն գովազդում է որպես մի վայր, որտեղ հաճախորդներին սպասարկում են անհանգիստ երեխաներ և մռայլ, բայց ամենագեղեցիկ աղջիկները: