MediaHub.am-ը շարունակում է իր հետևորդներին ներկայացնել յուրաքանչյուր օրվա խորհուրդն ու նշանակությունն աշխարհում։
Հոգեկան առողջության համաշխարհային միության նախաձեռնությամբ ողջ աշխարհում հոկտեմբերի 10-ը 1992 թ-ից սկսած պաշտոնապես նշվում է որպես հոգեկան առողջության միջազգային օր:
Օրն ընդգրկված է ՄԱԿ-ի կողմից նշվող համաշխարհային և միջազգային օրերի ցանկում։
2007 թվականի հոկտեմբերի 10-11-ը ՄԱԿ-ում նշվեց նաև «Հոգեբանության օր» (անգլ.՝ Psychology Day), որի շրջանակներում անցկացվեց մի քանի միջոցառում՝ նվիրված հոգեկան առողջության համաշխարհային օրվան։ Միջոցառումներին մասնակցում էին Ամերիկյան հոգեբանական ասոցիացիան, Անալիտիկ հոգեբանության միջազգային ասոցիացիան և այլ կազմակերպություններ։ Հոգեբանության օրվա նպատակն էր իրականացնել գաղափարների փոխանակում հոգեբանների, ուսանողների միջև։
2008 թվականից Ռուսաստանում անցկացվում է «Հանուն հոգեկան առողջության ոլորտում անձնվիրության» ամենամյա մրցույթ։ Դրա նպատակն է հասարակության, ԶԼՄ-ների, մասնագիտական և ոչ մասնագիտական կազմակերպությունների ուշադրությունը հրավիրել բնակչության հոգեկան առողջության ամրապնդման, հոգեբուժության և հոգեկան հիվանդների արդիական խնդիրների վրա։
Ըստ Առողջապահության համաշխարհային կազմակերպության տվյալների` այսօր աշխարհում ավելի քան 450 մլն մարդ տառապում է հոգեկան հիվանդություններով: Արեւմտյան երկրներում ամեն 7-րդ մարդն ունի խանգարումներ ու շիզոֆրենիա կամ տառապում է դեպրեսիայով եւ ալկհոլիզմի հանդեպ հակվածություն ունի:
Այս օրվա նպատակն է` պայքարել դեպրեսիայի, շիզոֆրենիայի, Ալցգեյմերի հիվանդության, թմրանյութերից կախվածության, էպիլեպսիայի, մտավոր հետամնացության ու նմանօրինակ այլ խանգարումների ու հիվանդությունների դեմ: