Արցախն արդեն 43 օր է շրջափակման մեջ է. արցախցիներին կտրոններ են տրամադրվում սնունդ ստանալու համար, այդ կերպ որոշակիորեն լուծում տալով խնդրին, իսկ ինչպե՞ս է լուծվում դեղորայքի հարցը, հատկապես այն մարդկանց դեպքում, ովքեր պարբերաբար դեղորայք ընդունելու անհրաժեշտություն ունեն։
Արցախի Հանրապետական հիվանդանոցի անհետաձգելի բուժօգնության բաժանմունքի վարիչ, վիրաբույժ Գրիգորի Առուստամյանը MediaHub-ի հետ զրույցում հավաստիացնում է, որ հիվանդանոցը դեղորայքի պակաս չի ունենում, քանի որ Կարմիր խաչի միջազգային կոմիտեն պարբերաբար համալրում է պակաս դեղորայքի քանակն իրենց կողմից ներկայացված տվյալների հիման վրա:
«Շաքարային դիաբետի, զոբի կամ նման այլ հիվանդությունների դեպքում մարդիկ գալիս ստանում են, ճիշտ է՝ տեխնիկական դժվարություններ լինում են, բայց դրանից պացիենտները չեն տուժում, պահեստային ֆոնդերից ևս լրացվում է»,-ասաց Առուստամյանը։
Արցախի Հանրապետական ԲԿ-ում շարունակվում է դադարեցված մնալ պլանային վիրահատությունները, բայց խոսքը չի վերաբերում անհետաձգելի միջամտություններին, քանի որ գրեթե ամեն օր վիրահատություններ լինում են՝ շտապ դեպքերի մասով։ Բժշկի հավաստմամբ՝ հիվանդանոցում սեզոնային հիվանդությունների հետ կապված մարդկանց թվի աճ է գրանցվում, բայց կտրուկ ավելացում չկա։
«Հաճախ գիտակցելով, որ տվյալ մարդու տանը կարող է ցուրտ լինի, նա մրսի, հակված ենք լինում բուժումը հիվանդանոցում կազմակերպենք, քան թողնենք տուն գնա բժշկական ցուցումով»,-ասաց Գրիգորի Առուստամյանը, հավելելով, որ խոսքը սեզոնային գրիպների, մրսածության, թոքերի քրոնիկ հիվանդությունների սրացումների մասին է։
Արցախի Հանրապետական հիվանդանոցի անհետաձգելի բուժօգնության բաժանմունքի վարիչի խոսքով, հիվանդների տեղափոխման հարցը ևս Կարմիր խաչի միջազգային կոմիտեի օգնությամբ է կարգավորվում, բայց պացիենտների կուտակումներ չեն առաջանում։ Գրիգորի Առուստամյանը հավելեց, որ շարունակում են հաղթահարել ստեղծված իրավիճակով պայմանավորված խնդիրները, բայց դրանք ավելի շատ բարոյական են:
Շուշանիկ Միսկարյան