Վաշինգտոնը ԵԱՀԿ Մինսկի խմբում նոր համանախագահ է նշանակել Լորա Հոքլային (Laura Hochla). այդ մասին հայտնում է ադրբեջանական «Թուրան» գործակալության վաշինգտոնյան թղթակիցը՝ վկայակոչելով Պետքարտուղարության իր աղբյուրը:
«Տիկին Հոքլան հունիսի 21-ին ուղևորվել է Բրյուսել՝ հանդիպելու Եվրամիությունից և Ֆրանսիայից իր գործընկերների հետ Հայաստանի և Ադրբեջանի համար կայուն խաղաղության հաստատման հարցերով, իսկ հունիսի 27-ին հեռախոսով զրուցել է Մինսկի խմբի ֆրանսիացի համանախագահի և ԵԱՀԿ գործող նախագահի անձնական ներկայացուցչի հետ», - ամերիկյան Պետքարտուղարության ներկայացուցչի խոսքերն է մեջբերում «Թուրան»-ը։
Լորա Հոքլան մինչ նոր նշանակումը Պետդեպարտամենտում ղեկավարել է Հարավային Կովկասի և տարածաշրջանային հակամարտությունների հարցերով գրասենյակը:
ԱՄՆ Պետքարտուղարությունը ԵԱՀԿ Մինսկի խմբում նոր համանախագահ նշանակելու մասին պաշտոնապես չի հաղորդել, երեկ տարածած հաղորդագրությամբ միայն տեղեկացրել է, որ Մինսկի խմբի ամերիկացի համանախագահը, որի անունը նշված չէր, զրուցել է իր գործընկերների հետ՝ քննարկելու Լեռնային Ղարաբաղի ապագան։