Ռուսական մամուլն այսօր լուր հրապարակեց այն մասին, որ ՌԴ Դաշնության խորհրդում հաջորդ շաբաթ կքննարկեն Հայաստանի և Ադրբեջանի հետ եռակողմ միջխորհրդարանական երկխոսության անցկացման համար բանակցային խմբի ստեղծումը։ Ըստ աղբյուրի եռակողմ հանդիպումը «կարող է տեղի ունենալ շուտով, չի բացառվում, որ նոյեմբերին», սակայն անցկացման վայրը դեռ որոշված չէ։
MediaHub-ը դիմեց ՀՀ Ազգային ժողովի նախագահի խոսնակ Ծովինար Խաչատրյանին՝ հասկանալու, թե արդյոք խոսքը դեռ սաղմնային նախաձեռնության մասին է, թե՞ կան կոնկրետ գործընթացներ:
Խաչատրյանի խոսքով՝ այդ հարցին պատասխանելու համար, նախ, պետք է անդրադառնալ Սոչիում հոկտեմբերի 31-ին ընդունված եռակողմ հայտարարության այն հատվածին, որում ասվում է. «լրացուցիչ ջանքեր գործադրել մնացյալ, այդ թվում` հումանիտար խնդիրների հրատապ լուծման ուղղությամբ», ինչպես նաև «ուժի կիրառումից կամ դրա կիրառման սպառնալիքից զերծ մնալու, բոլոր խնդրահարույց հարցերը բացառապես ինքնիշխանության, տարածքային ամբողջականության և սահմանների անձեռնմխելիության փոխադարձ ճանաչման հիման վրա՝ համաձայն ՄԱԿ-ի կանոնադրության և 1991թ Ալմա-Աթայի Հռչակագրի լուծելու» մասին: Ըստ մեր զրուցակցի՝ հետո միայն կարելի է անդրադառնալ մնացած հարցերին, այդ թվում և միջխորհրդարանական հարթակի ձևավորմանը.
«Աղբյուրը նշում է նոյեմբեր ամիսը, բայց այս պահին դրա վերաբերյալ որևէ բան ասել չեմ կարող: Եթե նոյեմբերի ընթացքում բոլոր այդ հարցերը լուծված կլինեն, արդեն իսկ կանցնեն մյուս կետերին, այդ թվում և միջխորհրդարանական հարաբերությունների կարգավորմանը»,- ասաց Ծովինար Խաչատրյանը:
Ճշտող հարցին՝ այսինքն այս պահին խոսել այն մասին, թե ովքեր ընդգրկված կլինեն այս խմբում, ովքեր կներկայացնեն Հայաստանը Ռուսաստանի և Ադրբեջանի հետ սպասվելիք այս նոր ձևաչափում վաղ է, խոսնակը շեշտեց.
«Որևէ բան այս պահին ուրվագծված չէ և որևէ գործընթաց չկա»,- հավելեց Ծովինար Խաչատրյանը: