Բրիտանացի օրենսդիր Ջերեմի Քորբինը քննադատել է Մեծ Բրիտանիային եւ Արեւմուտքին Ուկրաինային զենք մատակարարելու համար՝ ասելով, որ զենքի տրամադրումը միայն «կերկարացնի» պատերազմը, հայտնում է The Telegraph-ը։
Լեյբորիստների նախկին առաջնորդն ասել է, որ Կիեւ զենք ուղարկելը վերջ չի դնի հակամարտությանը։ Քորբինն ասել է, որ իրեն «հիասթափեցրել է» այն, որ «համաշխարհային մի քանի առաջնորդներ հակամարտությունը քննարկելիս օգտագործում են «խաղաղություն» բառը՝ պնդելով, որ շատերն «օգտագործում են ավելի շատ պատերազմի եւ ավելի ագրեսիվ պատերազմի լեզուն»:
Իսլինգթոն-Նորթից անկախ պատգամավորը նաեւ ասել է, որ խաղաղ համաձայնագրի հասնելու համար «շատ ավելի շատ ջանքեր» պետք է ներդնել, եւ եթե ՄԱԿ-ը չկարողանա համաձայնության գալ հրադադարի շուրջ, ապա պետք է տեղը զիջի այն կազմակերպությանը, որը կարող է անել դա:
«Զենքի ներարկումը լուծման չի հանգեցնի։ Դա միայն կերկարացնի եւ կսրի այս պատերազմը։ Աշխարհն արթնացավ եւ հանկարծ հասկացավ, որ Ռուսաստանն ու Ուկրաինան հացահատիկի ամենամեծ արտահանողներն են աշխարհում, եւ ինչ-որ բան պետք է անել, ուստի նրանք պայմանավորվեցին։ Դա լավ քայլ է: Բայց դրա հետ մեկտեղ Ուկրաինային ավելի ու ավելի շատ զենքի մատակարարումը լուծման չի հանգեցնի»,- ասել է քաղաքական գործիչը։
Նրա խոսքով՝ խաղաղության հասնելու համար «ավելի, շատ ավելի շատ ջանքեր» են անհրաժեշ։ «Ինձ հիասթափեցնում է այն, որ համաշխարհային առաջնորդներից գրեթե ոչ ոք չի օգտագործում «խաղաղություն» բառը... Այս պատերազմն աղետալի է Ուկրաինայի ժողովրդի համար, Ռուսաստանի ժողովրդի եւ ամբողջ աշխարհի անվտանգության համար: Եվ ուստի ավելի ու ավելի շատ ջանքեր պետք է գործադրվեն խաղաղության հասնելու համար»։
Նրա խոսքով՝ ՄԱԿ-ը «պետք է լինի խաղաղության ջանքերի կենտրոնում»։ «Եթե ՄԱԿ-ը չի կարող զինադադարի հասնել, ապա հրավիրեք մեկ ուրիշին, ով կարող է՝ Աֆրիկյան միություն, Արաբական պետությունների լիգա, ամբողջ աշխարհում բազմաթիվ ֆորումներ կան, որոնք այս կամ այն կերպ ուղղակի տնտեսական շահ չունեն Ռուսաստանի եւ Ուկրաինայի միջեւ, որոնք կարող էին միջնորդ հանդիսանալ։ Բայց չէ որ պետք է խաղաղություն լինի»,- ասել է Քորբինը՝ նշելով, որ պատերազմը «մեծ» ազդեցություն է թողնում Եվրոպայի վրա էներգակիրների մատակարարումների առումով եւ հայտարարելով, որ Գերմանիան «առանց ռուսական գազի չի կարող գոյություն ունենալ»: