Եթե նույնիսկ մենք պարտվում ենք ԲԴԽ-ում, մնացած համակարգը զգաստանում է. «Հրապարակ»

Եթե նույնիսկ մենք պարտվում ենք ԲԴԽ-ում, մնացած համակարգը զգաստանում է. «Հրապարակ»

«Հրապարակ» թերթը գրում է․

Արդարադատության նախարարի պարտականությունները կատարող Գրիգոր Մինասյանին կառավարությունը չի շտապում նշանակել նախարար, քանի որ ՔՊ-ում դեմ են դրան։ Երեկ նա մեր հարցին այդպես էլ սպառիչ պատասխան չտվեց՝ ի՞նչ է կարծում՝ կնշանակե՞ն իրեն նախարար, եւ մինչ ե՞րբ կարող է կիսանախարարի կարգավիճակում մնալ։ «Իմ նշանակման հետ կապված՝ որեւէ քննարկում տեղի չի ունեցել, իսկ այլ մեկնաբանություններ ճիշտ չի լինի, որ ես անեմ։ Քաղաքական որոշում պետք է կայացվի, բայց դեռեւս նման քննարկումներ չեն եղել»,- ասաց Մինասյանը՝ նշելով, որ իրեն նման առաջարկ չի ներկայացվել։

- Երբ Կարեն Անդրեասյանն էր նախարարը, շատ գրվեց, որ արդարադատության նախարարությունը կարծես ընկել է դատավորների հետեւից, հաճախակի կարգապահական վարույթներ է ուղարկում ԲԴԽ, թեպետ մի մասը մերժվում է։ Դուք նույն ոճո՞վ եք շարունակելու աշխատել, թե՞ այլ մոտեցում ունեք այս հարցում։

- Իմ մոտեցումը հետեւյալն է․ եթե կա խախտում, եթե կա դիմում, որն արդարացի է, որտեղ կա նյութական կամ դատավարական նորմի խախտում, նույնիսկ առանց նայելու՝ դատավորն ով է, ինչ է, ես խնդրել եմ, որ անուն-ազգանուններն ինձ փակ տան, որ օբյեկտիվ կարողանամ էդ գործն ուսումնասիրելով տեսնել՝ խախտում կա՞, թե՞ չէ։ Որեւէ ձեւով կաշկանդված չեմ ինչ-որ մի միջնորդություն տանել-չտանելով, արձանագրում եմ խախտումը, տանում եմ Բարձրագույն դատական խորհուրդ, ինքներդ տեսնում եք՝ էնտեղ մեր թիմով կռվում ենք, պայքարում ենք, որպեսզի մեր դիմումատուի իրավունքները կարողանանք վերականգնել։ Էնպես չէ, որ նախկինում մեր ցուցանիշները շատ բարձր էին։

- «Մեր դիմումատու» ասելով՝ ո՞ւմ նկատի ունեք։

- Ով որ մեզ դիմել է՝ քաղաքացի, որի իրավունքը խախտվել է։ Վարույթների 70-80 տոկոսը քաղաքացու դիմումների վրա է հարուցվում, մի մասն էլ կա, որ ինքնուրույն ենք հայտնաբերում՝ «Դատալեքսով», կամ, տեսնելով մամուլում հայտարարություն, ուսումնասիրում ենք, կարգապահական վարույթը հարուցում ենք, հետո ուղարկում ենք ԲԴԽ։ Բայց ես մինչ այսօր մեր արդյունքներից այնքան էլ գոհ չեմ, կարող եք տեսնել, որ շատ չեն պատասխանատվության ենթարկված դատավորները, բայց նաեւ գիտեմ, որ նույնիսկ եթե մենք պարտվում ենք ԲԴԽ-ում, մնացած համակարգը, նայելով, հետեւելով էդ նիստերին, զգաստանում են եւ հասկանում են, որ, այո, գուցե ԲԴԽ-ում հասկանալով, որ դատարանը նման խախտման համար պատասխանատվության չպետք է ենթարկվի, բայց իրենք էլ ֆիքսում են, որ խախտում կա։

- Բայց այդ դեպքերն ազդակ չե՞ն արդարադատության նախարարության համար, որ եթե որոշ գործերով պարտվում եք, ուրեմն անարդարացի է ձեր մոտեցումը, ու պետք է ֆիլտրացիան ավելի խիստ անեք՝ ամեն մի փոքր խախտումով վարույթ չհարուցեք։

- Չէ, փոքր խախտումով չենք անում, մեծ խախտումներ են, ուղղակի մեր ԲԴԽ գործընկերները, նախկինում շատ խոհեմորեն մոտենալով այդ հարցին, ասում էին, որ դատարանը ծանրաբեռնված է, եւ եթե, օրինակ, կողմին երկու տարի վճիռ չի տրամադրվում, այո, դա խախտում է, բայց դա գործավարի պատասխանատվությունն է, դա ծանրաբեռնվածությունն է, որ պետք է լուծեք եւ այն։ Այսինքն՝ սուբյեկտիվ ընկալում կա։

- Նմանատիպ մի գործ էր քննվում ԲԴԽ-ում, որով դեռ ԲԴԽ-ն որոշում չի կայացրել՝ դատավոր Արթուր Ստեփանյանի կողմից ժամկետների խախտման գործով։ Դատավորը մեզ հետ զրույցում ասել էր, որ անհիմն է ձեր մեղադրանքը։ Հիմա, այդպիսի հարցերը, որոնք արդարադատության իրականացման հետ ուղիղ առնչություն չունեն, ինչո՞ւ եք ուղարկում ԲԴԽ։

- Ունեն ուղիղ առնչություն, հիմա բացատրեմ, թե ինչու։ Եթե դատավորը Ձեզ չտա վճիռը, Դուք զրկվում եք այդ վճիռը բողոքարկելուց, հարկադիր կատարում իրականացնելուց, եւ շատ հաճախ, երբ որ վճիռը չեն տալիս մարդուն, դրանով իր իրավունքը խախտվում է։

- Շատերի կարծիքով՝ այս գործիքը մահակ է դատական համակարգի գլխին, հատկապես՝ անհնազանդ դատավորների նկատմամբ, եւ այս վարույթներով փորձում եք ճնշել նրանց։

- Անհնազանդ դատավորներ չկան, եւ դրա ապացույցը, ի դեպ, իմ խոսքերը չեն, դրա ապացույցը ցուցանիշն է։ Այն դատավորները, որոնց նկատմամբ արել ենք, բացեք նայեք ԲԴԽ որոշումները։

- Օրինակ՝ նույն Մնացական Մարտիրոսյանի հետ կապված այդքան դժգոհություն կա, բայց չեմ հիշում, որ նրա մասով կարգապահական վարույթ ուղարկվի ԲԴԽ։

- Ես շատ անկեղծ պետք է լինեմ, որ իրավաբանական համայնքում միանշանակ չէ ընկալումը, այն առումով, որ Մնացական Մարտիրոսյանը համարվում է բավականին գրագետ դատավոր։ Այսինքն՝ շատերը համարում են, որ ինքը շատ գրագետ դատավոր է։ Մամուլում, իհարկե, քննարկվում է՝ քաղաքական, նախկին եւ այլն․․․

- Դե, խելացիները, պրոֆեսիոնալներն իրենց խելքն ու պրոֆեսիոնալիզմն ի չարս են օգտագործում, օրվա իշխանությանը ծառայում են ավելի գրագետ ձեւով։

- Դատավորների մասով թույլ տվեք՝ չմեկնաբանեմ։

- Կարեն Անդրեասյանը գնաց ԲԴԽ, Դուք մնացիք նախարարությունում, հաշվի առնելով, որ նա Ձեր վաղեմի մտերիմ ընկերն է, նույն վարույթների մասով մարդկանց մոտ օբյեկտիվության, անաչառության կասկած չի՞ առաջանա, որ մի ընկերը նախարար է, մյուսը՝ ԲԴԽ նախագահ, եւ նա կարող է Ձեր ուղարկած վարույթների մասով աջակցել Ձեզ։

- Չի կարող այդ մոտեցումն արդարացված լինել, նախ՝ ԲԴԽ-ն կոլեգիալ մարմին է, երկրորդը՝ ես գործում եմ իմ լիազորությունների շրջանակում, ու միայն ես չէ, որ այդ միջնորդությունները կազմում եմ, դա մեր վերահսկողական վարչությունն է, համապատասխան բաժինն է անում, եւ, էլի եմ ասում, գնալ էնտեղ թույլ գործով, դա ինձ է վատ։ Ես չեմ կարող վերցնել վատ գործը եւ գնալ ԲԴԽ-ում պարտվել։ Ես ամեն անգամ այդ գործերն այնքան եմ հղկում, այնպես եմ մշակում, որպեսզի հնարավորինս մեր հաղթանակների թիվը բարձրանա։

- Իսկ քանի դեռ ԺՊ եք, այս ընթացքում գործեր ուղարկե՞լ եք ԲԴԽ։

- Այո, 1-2 գործ արդեն ուղարկել եմ։

- Ամեն դեպքում, ճի՞շտ եք համարում Կարեն Անդրեասյանի՝ քաղաքական, կուսակցական անձի արագ փոխակերպումը դատական իշխանության ներկայացուցչի, երբ որ մարդը քաղաքական պաշտոնից նշանակվում է ԲԴԽ նախագահ՝ մի գիշերում հրաժարվելով կուսակցական անդամատոմսից։

- Ես գտնում եմ, որ մարդու անաչառությունը գնահատելու համար պետք է արձանագրել եւ գնահատել իր անցած ճանապարհը։ Իսկ Կարեն Անդրեասյանը նախկինում իր ծավալած գործունեության ընթացքում որեւէ կասկածի տեղ, կարծում եմ, չի տվել, որ գործում է անաչառ եւ օրենքի, իրեն վերապահված լիազորությունների շրջանակում՝ անկախ նրանից, թե ում կողմից է ընտրվել կամ ում կողմից է առաջադրվել։

Մանրամասները՝ թերթի այսօրվա համարում։