Երեկ Լիբիայի մայրաքաղաքում բախումներ են տեղի ունեցել երկու հակառակորդ վարչակազմերի կողմից աջակցություն վայելող աշխարհազորայինների միջեւ՝ երկարատև քաղաքական փակուղու համատեքստում վերականգնելով բռնության կիրառումը երկրում, հայտնում է NBC News-ը
Առողջապահության նախարարությունը հայտնել է, որ զոհվել է առնվազն 23, եւ վիրավորվել՝ 140 մարդ։ 64 ընտանիք տարհանվել է մարտական գործողությունների շրջաններից։
Լրատվականը նշել է, որ էսկալացիան սպառնում է կոտրել հարաբերական անդորրը, որը Լիբիան վայելում էր վերջին երկու տարիների ընթացքում:
Ընդհարումների ընթացքում մահացել է նաեւ կատակերգու Մուստաֆա Բարաքան, որը հայտնի է սոցիալական ցանցերում հրապարակած աշխարհազորայիններին եւ կոռուպցիան ծաղրող իր տեսահոլովակներով: փրկարար ծառայության ներկայացուցիչ Մալեք Մերսեթը նշել է, որ Բարաքան մահացել է կրծքավանդակի շրջանում ստացած կրակոցից հետո:
Առողջապահության նախարարության հայտարարության մեջ ասվում է, որ մայրաքաղաքի հիվանդանոցներն ու բժշկական կենտրոնները կրակի տակ են հայտնվել, իսկ շտապօգնության բրիգադներին արգելվել է տարհանել խաղաղ բնակիչներին:
Տրիպոլիի քաղաքային խորհուրդը մեղադրել է իշխող քաղաքական դասին՝ մայրաքաղաքում իրավիճակի վատթարացման համար եւ միջազգային հանրությանը կոչ արել «պաշտպանել Լիբիայում ապրող խաղաղ բնակչությանը»։