«Մամիկոն Ասլանյան» դաշինքը կուսակցին մեղադրում է իրենց կալանավորված առաջնորդի անունից կեղծ տեղեկություններ տարածելու համար։ Օրեր առաջ տեղի ունեցած Վանաձորի ավագանու նիստին «Մամիկոն Ասլանյան խմբակցությունից» ընդամենը երկու անդամ էր մասնակցել, որի արդյունքում քվորում էր եղել և իշխանական ուժերին մեկ տարի անց հաջողվել էր բյուջե հաստատել։
Նիստին ներկայացած Սեյրան Ղամբարյանը հայտարարել էր, թե բանտում հանդիպել է արդեն մեկ տարի կալանքի տակ գտնվող նախկին համայնքապետ Ասլանյանին, որն իրեն հանձնարարել է մասնակցել նիստին։
Ավելի ուշ «Մամիկոն Ասլանյան» դաշինքն է հայտարարություն տարածել ու նշել, թե դեկտեմբերի 14֊ին տեղի ունեցած ավագանու նիստին հայտարարություններն են հնչել, որոնք անհիմն են և «իրականության հետ որևէ աղերս չունեն»։
«Մամիկոն Ասլանյանն ավագանու նիստերի վերաբերյալ իր դիրքորոշումը չի փոխել և որևէ ավագանու անդամի համաձայնություն կամ լիազորություն չի տվել նիստերին մասնակցելու կամ դաշինքի ու ղեկավարի անունից` իրականությանը չհամապատասխանող հայտարարություններ, հորդորներ տարածելու։ Ավագանու առանձին անդամների գործողությունները կրում են զուտ անհատական բնույթ, և յուրաքանչյուրն առաջնորդվում է իր խղճով ու բարոյականությամբ, գուցե նաև այլ շահագրգռությամբ», - ասված է հաղորդագրությունում։
Ինքը՝ Մամիկոն Ասլանյանն, այս թեմայով որևէ հայտարարություն առայժմ չի արել: Եթե անկեղծ լինենք, դրա անհրաժեշտությունը, թերևս, առաջվա սրությամբ այլևս չկա:
Ակնհայտ է, որ կալանավորված քաղաքապետի երկու կողմնակիցներ, ըստ էության, լեգիտիմացրել են, այսպես ասած, վարչապետական կառավարումը Վանաձորում: Ոմանք դա կարող են համարել Ասլանյանի ու իշխանության գործարքի, մյուսները՝ իշխանության ու խմբակցության երկու «դասալիքների» գործարք:
Մեկնաբանությունները թողնենք դրանց հեղինակների ճաշակին, այստեղ խնդիրն ավելի խորքային է՝ այսօր քաղաքը ղեկավարում է մի վարչակազմ, որը վանաձորցիների քվեարկության արդյունք չէ:
Ստեղծված իրավիճակում միակ ռացիոնալ ելքն առաջարկել է «Հայրենիք» խմբակցությունը՝ ցույց տալով արտահերթ ընտրությունների ճանապարհը: Մյուս խմբակցությունները պետք է պատասխանեն այս առաջարկությանը: Դա իրական լակմուսի թուղթ է, որը կսահմանազատի իրական և ֆեյք ընդդիմադիրներին:
Վահրամ Բագրատյան