Հակակոռուպցիոն դատարանի դատավոր Տիգրան Դավթյանը ԱԻՆ նախկին նախարար Անդրանիկ Փիլոյանին 15 միլիոն դրամ գրավի դիմաց երկու օր առաջ ազատ է արձակել։ Այս մասին այսօր MediaHub.am-ին փոխանցեց նախկին նախարարի փաստաբան Տիգրան Սարգսյանը։
Հիշեցնենք, որ ՀՀ հակակոռուպցիոն կոմիտեում քննված բազմադրվագ քրեական վարույթով կատարված նախաքննության ընթացքում ձեռք բերված բավարար ապացույցների համակցությամբ բացահայտվել են ՀՀ արտակարգ իրավիճակների նախարարության պաշտոնատար և այլ անձանց կողմից 2021-2022 թվականների ընթացքում խոշոր չափերով կաշառք տալու, ստանալու, կաշառք ստանալուն օժանդակելու, ապօրինի վարձատրություն ստանալու և տալու դեպքեր, որոնցում ներգրավված են եղել Արտակարգ իրավիճակների նախարար Անդրանիկ Փիլոյանը և ԱԻ նախարարության աշխատակիցներ, այդ թվում` տարբեր ստորաբաժանումների ղեկավարներ և այլ անձինք: Մասնավորապես ԱԻ նախկին նախարար Անդրանիկ Փիլոյանը մեղադրվում է 2022-ին՝ իր պաշտոնավարման ընթացքում որպես կաշառք 1 մլն դրամ, ոսկու ձուլակտոր ստանալու մեջ։
Հարցին, թե այս ընթացքում վկաներ ցուցմունք տվե՞լ են, վերջինս պատասխանեց, որ գործն ընթանում է իր հունով։
«Այդ դատական գործը դեռ տարիներ է տևելու»,-ասաց նա։
Լիաննա Թորոսյան