Երկու շաբաթից ավելի է անցել, բայց իմ նկատմամբ սպանության փորձը չի բացահայտվել, որևէ մեկը բերման չի ենթարկվել, չի ձերբակալվել։ Սա ես ընկալում եմ որպես պաշտոնական հաստատում, որ հանցագործության գլխավոր կազմակերպիչն ու պատվիրատուն կա՛մ Նիկոլ Փաշինյանն է, կա՛մ նրա կինը։ 

Այս մասին այսօր MediaHub.am-ի հետ զրույցում ասաց Լեհաստանում ՀՀ նախկին դեսպան, ՍԴ աշխատակազմի նախկին ղեկավար Էդգար Ղազարյանը՝ խոսելով իրեն ծեծի ենթարկելու դեպքի մասին։

Էդգար Ղազարյանը հենց միջադեպի օրն էլ  մեղադրեց իշխանականներին, իշխանականներն էլ արձագանքեցին՝ ցնդաբանություն է, թե իրենցից որևէ մեկը կապ ունի այդ ամենի հետ։

MediaHub.am-ի աղբյուրներից էլ վստահեցրին՝ դժվար թե Նիկոլ Փաշինյանի, կամ նրա կնոջ, կամ էլ որևէ ՔՊ-ականի մատը խառը  լինի այս գործում, և եթե ուզում ենք պարզել, թե ով է ծեծը կազմակերպել, ապա պետք է ավելի հեռուն նայենք՝ Լեհաստան։ Աղբյուրի փոխանցմամբ՝ Լեհաստանում ՀՀ դեսպան եղած տարիներին Ղազարյանը խոշոր պարտք է վերցրել, հիմա էլ պարտատերերը եկել են իրենց «եղ ու բրնձի հետևից»։

Էդգար Ղազարյանի համար այս խոսակցությունն անհեթեթություն է։ «Ի՞նչ պարտք։ Բացի իմ ծառայողական պարտավորությունները կատարելուց Լեհաստանում ոչ մի այլ գործունեությամբ չեմ զբաղվել։ Որևէ մեկից պարտք չեմ վերցրել, չեմ տվել, իմ ընտանիքին պահելու համար միայն իմ աշխատավարձն եմ օգտագործել։ Բացառվում է, որ նման բան եղած լինի։ Ոչ միայն դեսպան եղած տարիների ընթացքում, այլ առհասարակ, ինչ պաշտոն էլ որ ստանձնել եմ, նման բան չի եղել։ Սա ևս ապացույց է, որ իշխանությունն ուզում է իր մեղքն իր վրայից գցել ու շեղել սլաքները, որ իրենց են ցույց տալիս։ Այլ տարբերակ չկա, քաղաքական պատվեր է»,-պատմեց նա։

Լիաննա Թորոսյան