2023թ. փետրվարի 20-ին «Հայրենիք» կուսակցության նախագահ Արթուր Վանեցյանը մասնակցել է Ղարաբաղյան շարժման 35 ամյակին նվիրված «Ղարաբաղյան պրոֆիլ» համաժողովին։
Միջոցառումը, որի քննարկումներին մասնակցել են տարածաշրջանային քաղաքականության և անվտանգության հարցերով փորձագետներ ու ճանաչված մասնագետներ, կազմակերպվել է «Պրոֆիլ» հրատարակչության կողմից՝ «Հայրենիք» հիմնադրամի աջակցությամբ։
Ողջույնի իր խոսքում Արթուր Վանեցյանը կարևորել է խաղաղության պայմանագրի շուրջ ընթացող բանակցությունների թափանցիկությունը։ «Բոլոր բանական մարդիկ ցանկանում են ապրել խաղաղ պայմաններում, խաղաղության մասին պայմանավորվածություն ձեռք բերել։ Այնուամենայնիվ, թշնամու հետ խաղաղության վերաբերյալ որևէ համաձայնություն ստորագրելուց առաջ անհրաժեշտ է հասկանալ, թե ինչ է թշնամին պահանջում խաղաղության դիմաց։ Այլ կերպ ասած՝ ո՞րն է գինը, որը Հայաստանն ու Արցախը պետք է վճարեն խաղաղության համար», - ասել է Արթուր Վանեցյանը։
Վանեցյանն ուշադրություն է հրավիրել այն փաստի վրա, որ ՀՀ իշխանությունները, առանց ժողովրդին որևէ տեղեկություն տրամադրելու, խաղաղության պայմանագրի նախագիծ են հանձնում թշնամուն։ «Ինչի՞ մասին է այդ պայմանագիրը և արդյո՞ք դրա ստորագրումից հետո Արցախի ժողովուրդը կկարողանա շարունակել անվտանգ ապրել իր ծննդավայրում», - ասել է Վանեցյանը՝ հավելելով, որ ժողովրդի շրջանում վստահություն չկա որոշում կայացնողների հանդեպ։
Արթուր Վանեցյանի կարծիքով Հայաստանի և Արցախի շուրջ ստեղծված վտանգավոր իրավիճակի գլխավոր մեղավորները և պատասխանատուները ՀՀ իշխանություններն են, և նրանց հակազդելու միակ միջոցը հասարակության համախմբումն ու համերաշխությունն է։
