Ճապոնիային մոտեցող «Ամպիլ» թայֆունը խափանումներ է առաջացրել երկրի տրանսպորտային համակարգում, հաղորդում է The Japan News-ը:
Մասնավորապես, All Nippon Airways-ը և Japan Airlines-ը ուրբաթ օրը Տոկիոյի օդանավակայաններում չեղարկել են 654 ներքին և միջազգային չվերթ։ Թռիչքների չեղարկումներն ու հետաձգումները ազդել են Օսակայի, Չուբուի և Կանսայի օդանավակայանների վրա:
Տոկիո և Նագոյա քաղաքների միջև արագընթաց գնացքների հաղորդակցությունն ընդհատվել է։ Ճապոնիայի մայրաքաղաքում ուրբաթ օրը սահմանափակված է մետրոյի երթեւեկությունը Տոզայ գծով։
Վատ եղանակի պատճառով Տոկիոյի Դիսնեյլենդը փակ է հանրության համար։
Վերջին տվյալներով՝ Չիբա, Տոկիո եւ Կանագավա պրեֆեկտուրաներում ավելի քան 1 հազար տուն մնացել է առանց էլեկտրականության։
Օդերեւութաբանների կանխատեսումների համաձայն՝ բնական աղետն ուղղակիորեն չի հարվածի Ճապոնիային, այլ կանցնի մոտով։ Սպասվում է, որ ուրբաթ ավելի ուշ փոթորիկը կբերի ուժեղ քամիներ, սողանքներ և ջրհեղեղներ Իձու կղզիներում և Տոկայ, Տոհոկու և Կոշինեցու շրջաններում:
Իրադարձություններին ավելի արագ հետևելու համար բաժանորդագրվեք՝ MediaHub1world