Ֆրանսիան երաշտի պատճառով կբախվի կարտոֆիլի անխուսափելի պակասի, Liberation թերթին ասել են ոլորտի մասնագետները:

Կարտոֆիլագործների ազգային միության (UNPT) ղեկավար Ժոֆրոյ դ’Էվրիի խոսքով՝ 2022 թվականը բերքատվության առումով վատագույններից է լինելու ավելի քան 20 տարվա ընթացքում։

«Մենք արտադրում ենք ավելի քան երեք միլիարդ եվրոյի կարտոֆիլ, բայց երաշտի հետևանքները կարող են կրճատել ծավալը մեկ միլիարդով», – նախազգուշացրել է նա:

Նշվում է, որ կարտոֆիլի պահանջարկն ընկնում է երեք հիմնական ոլորտների վրա՝ սննդի արդյունաբերություն, չիփսերի արտադրություն և թղթի ու ստվարաթղթի ստեղծում, որի համար անհրաժեշտ է կարտոֆիլի օսլա։

«Կասկած չկա, որ արտադրությունը չի բավարարի ողջ պահանջարկի համար»,- ասել են գյուղատնտեսները:

Ռեկորդային երաշտի պատճառով արտադրության առաջիկա անկման մասին են հայտնել կաթնամթերք արտադրողներն ու մեղվաբույծները: Կաթնամթերք արտադրողների ազգային ֆեդերացիայի (FNPL) նախագահ Թիերի Ռոկֆեյը հայտարարել է կաթի արտադրության 20%-ով կրճատման մասին։ Նրա խոսքով՝ դա պայմանավորված է ինչպես խոտի չորանալու, այնպես էլ կենդանիների ցածր շարժունակությամբ, որոնք շոգին գերադասում են թաքնվել ստվերում։

Ֆրանսիացի մեղվաբույծների միության (Ունաֆ) ղեկավար Քրիստիան Պոնտը 2022 թվականն անվանել է սև տարի արդյունաբերության համար:

Ֆրանսիան այս ամառ առերեսվել է շոգի մի քանի ալիքի, ջերմաստիճանը բարձրացել է 40 աստիճանից: Բարձր ջերմաստիճանի հետևանքով առաջացած երաշտի պատճառով հուլիսին ողջ հանրապետությունում ջրի օգտագործման սահմանափակումներ են մտցվել։