Դաշնակցային հարաբերություններ են մեր երկրների միջև, կան բազմաթիվ երկկողմ և բազմակողմ համաձայնություններ, որոշակի հարցերում կան նաև անհամաձայնություններ։
Այդ մասին այսօր ԱԳՆ-ում լրագրողների հետ հանդիպմանն ասաց ՀՀ արտաքին գործերի նախարար Արարատ Միրզոյանը՝ պատասխանելով հարցին, թե Մոսկվայի հետ հարաբերություններում ճգնաժամ կա՞, թե՞ ոչ։
Նրա խոսքով՝ հակասությունների մասին անգամ բարձրաձայնումներ կան, օրինակ՝ ՀԱՊԿ-ի դերակատարման, քաղաքական գնահատականների կամ դրանց բացակայության հետ կապված։
«Դրանք ճգնաժամ անվանելն ուռճացված կլինի, մենք մշտապես կապի մեջ ենք մեր ռուսաստանյան գործընկերների հետ։ Քննարկում ենք բազմահարց օրակարգի բոլոր հարցերը», - ասաց Միրզոյանը։
ԱԳ նախարարն անդրադարձավ նաև 2022 թվականի դեկտեմբերի 23-ին Մոսկվայում Ադրբեջանի և Ռուսաստանի արտգործնախարարների հետ հանդիպման չկայացմանը՝ նշելով, որ դրա պատճառը Լաչինի միջանցքի շրջափակումն էր։
«Մենք չենք չեղարկել այդ հանդիպումը, պարզապես հետաձգել ենք»,- նշեց Միրզոյանը։
Հարցին, թե հանդիպման վայրի ընտրությունն էական նշանակություն ունի՞, Միրզոյանը պատասխանեց․
«Հանդիպումները կարող են լինել Մոսկվայում, կամ այլ վայրում: Հանդիպումները տեղի են ունեցել տարբեր քաղաքներում։ Այո՛, տեղի ընտրությունը կարևոր է, բայց գործընթացի վրա չափազանց կարևոր ազդեցություն չունի։ Մենք պատրաստ ենք հանդիպել Մոսկվայում»։