Հայաստանի ներքաղաքական դաշտում նոր զարգացումներ են սպասվում.

Ամեն դեպքում, այդ մասին պնդում է ՀՀ ԶՈՒ գլխավոր շտաբի նախկին պետ Օնիկ Գասպարյանի խորհրդական Վլադիմիր Պողոսյանը, ով MediaHub-ի հետ զրույցում ասում է՝ իշխանափոխություն են անելու, կա այդ ուժը:

-Պարոն Պողոսյան, պատերազմի վտանգ տեսնու՞մ եք։ Արդեն մեկ ամսից ավելի ադրբեջանցիները փակել են Լաչինի միջանցքը, իրավիճակին ի՞նչ հանգուցալուծում է լինելու։

-Եթե նայենք, թե հիմա Ալիեւը ինչ թեզեր է առաջ բերում, ամեն ինչ ավելի ակնհայտ կլինի։ Ասում է՝ «որտեղ ուզեմ, այնտեղ էլ կկանգնեմ իմ զորքով»։ Շատ համաշխարհային վերլուծական կենտրոններ ասում են, որ պատերազմ հաստատ լինելու է։

Արցախը բլոկադայից չեն հանելու, այսպես էլ մնալու է, որովհետեւ իրենց պետք է, որ մենք, ասպես կոչված, «Զանգեզուրի միջանցքը» տանք իրենց։ Էրդողանը, Ալիեւը, բոլորը խոսում են միջանցքի մասին։ Մենք հասկանում ենք, որ 44-օրյա պատերազմը Արցախի հետ կապ չուներ, այն «Զանգեզուրի միջանցքի» համար էր։ Հետեւաբար, պատերազմ լինելու է. ցավոք՝ ո՛չ Արցախում, ո՛չ Հայաստանում ճիշտ չեն պատկերացնում ու վերլուծում իրողությունները, մտածելով, որ հնարավոր պատերազմը Ֆրանսիան, ԱՄՆ-ն կամ Ռուսաստանը չեն թողնելու։ Այդպիսի բան չկա։

-Հայաստանի իշխանությունների հեռացումը ե՞րբ եք տեսնում։ Փորձագետներ ու քաղաքական գործիչներ կան, ովքեր վստահեցնում են՝ Նիկոլ Փաշինյանը եկել էր Արցախը հանձնելու համար, «միսիան» իրագործված է, հեռանալու ժամանակն է։

-Այս իշխանությունները շատ ցածր ռեյտինգ ունեն, պարզապես ժողովուրդը վախենում է, որ հանկարծ նախկին իշխանությունները չգան։ Դա խնդիր է Հայաստանում։
 
-Իսկ Դուք այլ ուժ տեսնու՞մ եք, որ կարող է գալ իշխանության։

-Տեսնում եմ։

-Ո՞վքեր են, ե՞րբ կգան։

-Մենք շուտով կունենանք լուրջ խնդիրներ ու հետեւանքներ, որից հետո այդ ուժը ի հայտ է գալու։ Ես էլ եմ այդ ուժի անդամը։ Կոպիտ ձեւով չենք վերցնելու իշխանությունը, դա անելու ենք միայն խաղաղ ճանապարհով եւ դա անելու ենք այն պայմանով, որ պետությունը ուժ չկիրառի ժողովրդի դեմ։
 
-Այսինքն՝ դուրս են գալու մարդիկ, ովքեր պատրաստ կլինեն մինչեւ վերջ գնալ, եթե անգամ վերջը ճաղերի հետեւու՞մ է։
 
-Դուք էլ եք տեսնում, թե ընդդիմություն կոչվածն ինչ է անում։ Ժողովրդին երեկոյան ժամը 9-ին հավաքում են ԱԳՆ շենքի մոտ՝ պատերի հետ խոսելու։ Բղավում են՝ «Նիկոլ դավաճան», «Առանց թուրքի Հայաստան»։ Ոչ մի պաշտոնյա, այդ թվում՝ նախարարն այդ ժամին այնտեղ չէ։ Դրանք կենացներ են, հոգնեցնում են ժողովրդին, հետո ասում՝ գնացեք, կկանչենք։ Ժողովուրդն արդեն իրենց չի հավատում, ու իրենց հետեւից չեն գնալու։

-Ե՞րբ են սկսվելու իշխանափոխության համար պրոցեսներ։

-Իմ կարծիքով՝ շատ շուտով։ Մենք ճանաչում ենք տարբեր կուսակցությունների, ովքեր ասում են՝ ծրագիր ունեն։ Այդ կուսակցությունների մեջ մարդ չկա, որ ճանապարհ անցած լինի, համակարգի մեջ է եղել, հասկանում է, թե բանակը, անվտանգությունը, մշակույթը ինչ է։ Այս մարդիկ, որ գան, կստացվի՝ Նիկոլը գնաց, նոր Նիկոլ եկավ։ Մասնագետներ են պետք։
Արցախում տեսեք, թե ինչ է կատարվում․ նախկինների մարդկանց են բերում, Բակո Սահակյանի մարդկանց են նշանակում։ Այդ մարդիկ անմակարդակ են ու բան չեն հասկանում։
 
-Ձեզ համար Արցախի պետական նախարար Ռուբեն Վարդանյանը վստահելի՞ է։

-Նա շատ սխալ հայտարարություններ է արել, գուցե լավ մենեջեր է, բայց ոչ քաղաքական գործիչ։ Երբեք քաղաքականության մեջ չի եղել ու չի կարող բիզնեսից անմիջապես մտնել քաղաքականություն։

 -Արդյո՞ք նա, ըստ Ձեզ, Հայաստանում պաշտոն ստանալու հավակնություններ ունի, եւ կարող է ստանալ։

-Հայաստանում շանս չունի, ոչ մեկ իրեն չի հավատալու։ Բացի այդ, Սահմանադրությունը թույլ չի տալիս, որ դառնա Հայասատանի ղեկավար։ Ո՛չ Ռոբերտ Քոչարյանը, ո՛չ Սերժ Սարգսյանը, ոչ՛ Վարդանյանը շանս չունեն իշխանության գալու։
Ամենակարեւորը, որ ժողովուրդը հասկանա՝ նախկինները շանս չունեն, ու այդ ժամանակ հարյուր հազարից ավել մարդ դուրս կգա փողոց։ Հայաստանի իշխանության ղեկին ամակարդակ մարդիկ են, անգրագետ ու անգետ, մարդիկ դա շատ լավ են հասկանում։

Լիա Սարգսյան