Հայտնի են Աշտարակի բանկերից մեկում վիրավոր քաղաքացիների տվյալներն ու առողջական վիճակները
Աշտարակ քաղաքի բանկերից մեկում տեղի ունեցած պայթյունի հետևանքով վիրավորված 5 քաղաքացիների վերաբերյալ տեղեկություն ստանալու համար MediaHub.am-ը կապ հաստատեց Աշտարակ ԲԿ, որտեղից մեզ հայտնեցին, որ բանկի կառավարիչի՝ 30-ամյա Հովհաննես Կարապետյանի վիճակը գնահատվում է ծանր, նրան տեղափոխել են Երևան։
Հայտնի են նաև մնացած 4 անձանց տվյալները․
«Լենա Աբրահամյան, վերջինս ուներ թեթև մարմնական վնասվածքներ, նա ստացել է առաջին բուժօգնություն և գնացել է, Չախոյան Հայկ, նրան տեղափոխում են Երևան, Խումարյան Հարություն, նա հաճախորդ է, ով գնացել էր վճարում կատարելու, Մինասյան Արմեն, ով կնոջն էր տարել աշխատանքի, վնասվածք է ստացել գլխի հատվածում, նա ևս առաջին բուժօգնություն է ստացել և գնացել է, Շմավոնյան Լիլիթ` բանկի աշխատող է. բոլորի վիճակը գնահատվում է միջին ծանրության»,- հայտնեցին Աշտարակի ԲԿ-ից։
Նշենք, որ բանկի մաքրուհին՝ Խաչատրյան Ռուզաննան մահացել է։ Ինչպես արդեն հայտնել էինք այսօր՝ ժամը 09:07-ին, Արագածոտնի մարզային ճգնաժամային կառավարման կենտրոն ահազանգ է ստացվել, որ Աշտարակ քաղաքի բանկերից մեկում տեղի է ունեցել պայթյուն՝ հրդեհի բռնկմամբ: Նախնական տվյալներով՝ պայթյունի պատճառը եղել է գազաբալոնից արտահոսքը։
Մերի Գևորգյան