MediaHub-ը ներկայացնում է նոր խորագիր, թե ինչպես կարելի է լցնել առաջիկա հանգստյան օրերը: Մնում է որոշել՝ ո՞ւր գնալ, ինչո՞վ զբաղվել:

Հանգիստն անցկացնելու ամենատարածված ու սիրելի տարբերակներից մեկն, իհարկե, ֆիլմերի դիտումն է, հատկապես երբ դրսում անձրևային եղանակ է: Ինչպե՞ս դա կազմակերպել. օգնության են հասնում կինոթատրոնները: Առաջիկա հանգստյան օրերին՝ հոկտեմբերի 15-16ին երևանյան կինոթատրոններում կարող եք դիտել «Տոմս դեպի դրախտ» անզուգական Ջուլիա Ռոբերթսի և Ջորջ Քլունիի մասնակցությամբ, երկար սպասված նոր «Սարդ-մարդը», հայկական “Գարուն ա” և ռուսական՝ «Պարմայի սիրտը» ֆիլմերը: 

Եթե նշված ֆիլմացանկում ոչինչ չգրավեց, առաջարկում ենք նախընտրելին փնտրել բեմերում: Օրինակ, այսօր Երևանի Հրաչյա Ղափլանյանի անվան դրամատիկական թատրոնի բեմում «Օրնիֆլ» ներկայացումն է, իսկ Բոհեմ թատրոնի բեմում Ռաֆայել Երանոսյանը կներկայացնի իր «Էվոլյուցիա» նոր մոնո-ներկայացումը՝ դեռ կհասցնեք այսօրվա երեկոն պլանավորել ըստ այս ցանկի: Վաղը Ալ.Սպենդիարյանի անվան օպերայի և բալետի թատրոնի բեմում դարձյալ, բայց միշտ սպասված «Գայանե» բալետն է, թատրոնասերներին սպասվում են «Իմ ընտանիքը իմ ճամպրուկում է» կամ «Կախարդվածը» ներկայացումները: 

Հետաքրքիր երեկո է սպասվում հոկտեմբերի 15-ին Զվարթնոցի տաճարում. մայրամուտին, musicAeterna Dance խմբի կողմից  այստեղ կցուցադրվի «Տառապանքը բոլոր լեզուներով նույն կերպ է հնչում» պար-ողբի պրեմիերա: Խորեոգրաֆ՝ Վլադիմիր Վառնավա, ռեժիսոր՝ Աննա Գուսևա:

Բացի այս, The club-ը հրավիրում է միասին պատրաստել թթխմորով հաց և համեղ ընկույզով գաթա, Պոլիտեխնիկական համալսարանի այգում հոկտեմբերի 15-ին կանցկացվի Գիտության փառատոն, իսկ «TUF» բարը, Բակ75-ը իր «Back to 2000's» երեկոյով հրավիրում են պարելու: 

Ուրախ, հագեցած ու, կարևորը, խաղաղ հանգստյան օրեր ենք մաղթում: