Ե՛վ գյուղի մեջ են հարվածել, և՛ սահմանին․ կանանց և երեխաներին տարհանել ենք, Վարդենիսում են։ Այս մասին այսօր MediaHub.am-ին փոխանեց Գեղարքունիքի մարզի Վերին Շորժա համայնքի վարչական ղեկավար Արտյոմ Երանոսյանը։
«Տվյալ պահին կրակոցները դադարել են, համայնքի վնասները չենք կարող այս պահին հաշվել։ Ամեն տեղ էլ խփել են։ Տղամարդիկ այս պահին համայնքում են», - ասաց նա:
Հարցին՝ զոհեր կամ վիրավորներ կա՞ն համայնքում, վերջինս պատասխանեց՝ այս պահին ոչինչ ասել չի կարող։
Հիշեցնենք, որ սեպտեմբերի 13-ին՝ ժամը 00:05-ից, Ադրբեջանի ԶՈՒ ստորաբաժանումները Գորիսի,Սոթքի և Ջերմուկի ուղղությամբ հրետանային միջոցներից, խոշոր տրամաչափի հրաձգային զինատեսակներից սկսել են ինտենսիվ կրակ վարել հայկական դիրքերի ուղղությամբ: Առավոտյան 8-ի դրությամբ իրադրությունը հայ-ադրբեջանական սահմանին էական փոփոխություններ չի կրել։ Հակառակորդը շարունակում է Վարդենիսի, Սոթքի, Արտանիշի, Իշխանասարի, Գորիսի և Կապանի ուղղություններով կիրառել հրետանային միջոցներ, ականանետեր, ԱԹՍ-ներ և խոշոր տրամաչափի հրաձգային զինատեսակներ՝ թիրախավորելով թե՛ ռազմական և թե՛ քաղաքացիական ենթակառուցվածքները։ Սահմանի որոշ հատվածներում դիրքային մարտերը շարունակվում են, հակառակորդը չի դադարեցնում առաջխաղացման փորձերը։
Լիաննա Թորոսյան