Երրորդ երեխան մահացել է Կրասնոյարսկի երկրամասում՝ գյուղական խանութից գնված հավ ու պելմենի ուտելուց հետո, այս մասին հաստատել են ՌԴ Քննչական կոմիտեի Կրասնոյարսկի երկրամասի և Խակասիայի Հանրապետության գլխավոր քննչական վարչության մամուլի ծառայությունից։

«Այո, ևս մեկ երեխա է մահացել, տարիքը ճշտվում է»,- լրագրողներին հայտնեցին մամուլի ծառայությունից։

Ավելի վաղ շրջանային քննիչը հայտնել էր, որ ընտանիքը, այդ թվում՝ 6, 11, 12 և 13 տարեկան չորս երեխաներ, թունավորվել են՝ ընթրիքին Կրասնայա Սոպկա գյուղում գնված տեղական խանութից հավ ու պելմենի ուտելուց հետո։ Շաբաթ օրը՝ սեպտեմբերի 21-ին, ընտանիքի բոլոր անդամների մոտ հայտնաբերվել են սննդային թունավորման նշաններ։ Նրանք հիվանդանոց են դիմել առավոտյան ժամը 11-ի սահմաններում սրտխառնոց ու փսխման ախտանիշներով։ Դրանից հետո վեցամյա աղջկա և տասներեքամյա տղայի ինքնազգացողությունը հանկարծակի վատացել է, և նրանք մահացել են հիվանդանոցում։