Խորհրդարանական ընդդիմությունն այսօր չի մասնակցի Կառավարության հետ հարցուպատասխանին:
MediaHub-ի հետ զրույցում այս լուրը հաստատեց «Հայաստան» խմբակցության պատգամավոր Ագնեսա Խամոյանը: Հարցին, թե ինչու ընդդիմությունը չի մասնակցելու, Խամոյանը հղում արեց ավելի վաղ խմբակցության կողմից արված հայտարարությանը:
Հիշեցնենք, որ հայտարարության մեջ նշվում էր, որ շարունակելու են քաղաքական բոյկոտը և «չեն մասնակցելու ոչ առաջնային, հաճախ էլ արհեստական օրակարգերով լեցուն ԱԺ և նրա հանձնաժողովների նիստերին»:
«Մենք համոզված ենք, որ իշխանափոխությունն այն անհրաժեշտ նվազագույն պայմանն է, որի դեպքում է միայն հնարավոր լուծել մեր երկրի առաջ ծառացած խնդիրները, հաղթահարել մարտահրավերները, փակել պարտության էջը, դուրս գալ այս նվաստացած վիճակից», - ասված էր խմբակցության հայտարարությունում:
Նկատենք, որ ընդդիմությունը չմասնակցեց Կառավարության հետ հարցուպատասխանին նաև Նիկոլ Փաշինյանի Ալիևի և Էրդողանի հետ հանդիպումից առաջ, ինչի համար քննադատության արժանացավ: Այս դեպքում ընդդիմությունը հրաժարվում է առերեսվել Փաշինյանին վերջինիս Սոչի մեկնելուց առաջ, որտեղ նախատեսված է հանդիպում Ալիևի հետ՝ ՌԴ նախագահ Վլադիմիր Պուտինի մասնակցությամբ: Թեև ՔՊ-ում կան մարդիկ, որոնք կասկածում են, որ Փաշինյանն այդ հանդիպմանը կմեկնի: